XİN ABŞ-ın Corciya ştatının qondarma “DQR”-in müstəqilliyini tanımasına münasibət bildirib

Azərbaycanın Xarici İşlər Nazirliyi (XİN) ABŞ-ın Corciya ştatının Nümayəndələr Palatasının qondarma “Dağlıq Qarabağ Respublikası”nın (DQR) müstəqilliyini tanıması barəsində qəbul etdiyi qətnaməyə münasibət bildirib.

Məsələ ilə əlaqədar 1news.az-a Xarici İşlər Nazirliyinin mətbuat xidmətinin rəhbəri Hikmət Hacıyev münasibətini açıqlayıb.

H.Hacıyev qeyd edib ki, 15 dəqiqəlik müzakirə nəticəsində ABŞ-ın Corciya ştatının Nümayəndələr Palatasında Azərbaycanın Ermənistan tərəfindən işğal edilmiş ərazilərində yaradılmış qondarma rejimin guya tanınması barədə hansısa qətnamə qəbul edilib:

“ABŞ tərəfindən Azərbaycanın beynəlxalq səviyyədə tanınmış sərhədləri daxilində ərazi bütövlüyü və suverenliyi tanınır və dəstəklənir. Ermənistan bu kimi cılız və təxribatçı əməllərlə Ermənistan-Azərbaycan münaqişəsinin beynəlxalq hüququn norma və prinsipləri və BMT Təhlükəsizlik Şurasının 822 (1993), 853 (1993), 874 (1993) və 884 (1993) saylı qətnamələri əsasında danışıqlar yolu ilə həllinə, regionda davamlı sülh və təhlükəsizliyin təmin olunmasına yönəlmiş səylərə xələl gətirməyə, Azərbaycan ərazilərinin işğalını davam etdirməyə və mövcud status kvonu saxlamağa çalışır”.

1news.az