Eldar Mahmudov “Ağ ləpələr” üzərində: keçmiş nazir haqqında yeni faktlar
Sabiq milli təhlükəsizlik naziri Eldar Mahmudovun doyumsuz iştahı haqqında yazmayan bəlkə də ancaq tənbəllərdir.
Aydın olub ki, Mahmudov və topladığı paqonlu cinayətkar dəstə uzun müddət şantaj, basqınçılıqla məşğul olub. “Himayədarlığa” görə iş adamlarını xərac verməyi məcbur edir, əmrlərinə tabe olmayanlara qarşı amansız cəzalar tətbiq edir, özünü Azərbaycanın “don Korleonesi” zənn edirdi.
.jpg)
1news.az redaksiyasına belə faktlardan biri haqqında məlumat daxil olub. Məlumatda iş adamı Vüqar Ağayevə qarşı həyata keçirilən qanunsuz əməllərlə bağlı faktlar yer alıb. Bu məlumatlar iş adamının atası tərəfindən verilib və o, ancaq indi ailəsinin problemi haqqında danışmağa cəsarət edib.
Belə faktların hələ nə qədər aşkar olunacağını isə ancaq ehtimal etmək mümkündür. Lakin təkcə elə bu işdə maxinasiyaların həcmi sahibkarlardan əldə olunan yüksək məbləğlər haqqında təsəvvür yaradır.
Məlumata görə, sabiq milli təhlükəsizlik naziri Eldar Mahmudov 2007-ci ildə iş adamı “R.A.N.” müəssisəsinin təsisçisi Ağayev Vüqar Asif oğluna Bakı şəhəri Cəfər Cabbarlı və Bəsti Bağırova küçəsinin kəsişməsində 25 mərtəbəli biznes mərkəzi tikintisini sifariş edib. V.Ağayevin tikinti işlərinə 7 milyon manatdan artıq xərc çəkməsinə baxmayaraq, ödəniş qismən qarşılanmışdı.
Lakin iştahı getdikcə artan E.Mahmudov “Dostluq” parkının yaxınlığında V.Ağayev tərəfindən şəxsən onun üçün tikilən 2 milyon 800 min manatlıq villaya görə bir qəpik də olsun ödəniş etməyib.
Öz tahamının qurbanına çevrilən E.Mahmudov 2009-cu ildə Vüqar Ağayevə məxsus Bakı şəhəri Nobel prospekti 2207 ünvanında yerləşən 8.18 ha torpaq sahəsində “Ağ ləpələr” villa şəhərciyi tikilməsi nəzərdə tutulmuş əraziyə baxaraq həmin layihəyə guya sərmayə qoyub şərik olacağını V.Ağayevə bildirib.
Lakin əsl niyyəti həmin layihəni ələ keçirmək olan E.Mahmudov 2009-cu ilin avqust ayında qohumu Musa Mahmudov vasitəsi ilə V.Ağayevi qəbuluna çağırıb. Qəbulda E.Mahmudov 2007-ci ildə sifariş verdiyi biznes mərkəzinin tikintisinə çəkilən xərcin 2.800.000 manatı keçmədiyini və V.Ağayevin qalan pulu mənimsədiyini bildirərək Musa Mahmudova tikinti yerində yoxlama aparmağı tapşırıb.
Bir ay sonra şantaj yenə də davam edir. İkinci dəfə E.Mahmudovun qəbulunda olan V.Ağayevə sabiq nazir sözarası zarafatla “camaat mənim qapımda növbəyə durur ki, hədiyyə versin, sən isə torpağı vermək istəmirsən” deyir.
V.Ağayev həmin təklifdən imtina etdiyini görən E.Mahmudov “səni içəri salaram və sən verməzsən sənin balalarından alaram” deyib hədə-qorxu gələrək sabahı gün torpağın rəsmiləşdirilməsinə göstəriş verib.
Gec də olsa V.Ağayev anlayıb ki, E.Mahmudov nəinki ona olan çoxmilyonlu borcunu qaytarmaq istəmir, əksinə, “Ağ ləpələr”i ələ keçirmək istəyir.
E.Mahmudovun hədəsindən bərk qorxuya düşən V.Ağayev sabahı gün əmlakları barədə atasının adına etibarnamə verərək əvvəlcə Gürcüstana, ordan Fransaya, sonra isə Amerika Birləşmiş Ştatlarına üz tutub.
Amerikada olduğu müddətdə atası Asif Ağayevə hədə-qorxu gəlinməklə Bakı şəhəri Nobel prospekti 2207 ünvanında olan 8.18 ha torpaq sahəsi E.Mahmudovun oğlu Anar Mahmudovun faktiki rəhbərliyi altında olan “İnşaatçı-E” MMC şirkətinə keçirilib.
Belə ki, həmin “İnşaatçı-E” MMC şirkətinin rəhbəri Orxan Seyidov Anar Mahmudovun təsisçisi olduğu “Kaspian-Petrol” MMC-nin də rəhbəridir.
Bundan başqa, hədə-qorxu ilə iş adamı V.Ağayevin Bakı şəhəri Salyan şosesində olan 8 hektar, Zirə qəsəbəsində şərikli aldığı 5 hektar və Şüvələn qəsəbəsində şərikli aldığı 1,2 hektar torpaq sahəsi də E.Mahmudovun qohumlarının adına rəsmiləşdirilib.
Vüqar Ağayevə məxsus 810.000 manat dəyəri olan 270 m2 qeyri-yaşayış sahəsi, 50.000 manat dəyərində “Mercedes” avtomobili də E.Mahmudovun yaxın ətrafının adına rəsmiləşdirilməklə əlindən alınıb.
2009-cu ilin sentyabr ayından öz vətənindən didərgin salınan Vüqar Ağayev nəhayət 2016-cı ilin yanvarında, təhlükəsizliyini təhdid edən əsas qüvvə - Eldar Mahmudov vəzifəsindən kənarlaşdırıldıqdan sonra evinə qayıdaraq Vətən həsrətinə son qoyub.
Ümid edirik ki, doğmalarına qovuşan Vüqar Ağayev tezliklə E.Mahmudov və onun cinayətkar qruplaşmasının şantaj və təhdid yolu ilə ələ keçirdiyi 30 milyon manat dəyərində şəxsi əmlakını geri qaytara biləcək. Bu işdə günahkar olanlar isə gərəkən cəzanı alacaqlar.
1news.az
