Azərbaycanda həlak olan neftçilərin xatirəsini əbədiləşdirən abidə ucaldılacaq
Martın 17-də SOCAR-ın prezidenti Rövnəq Abdullayev dekabrın 4-də təbii fəlakət nəticəsində “Günəşli” yatağındakı 10 və ''Neft Daşları''ndakı 501 nömrəli dəniz özüllərində baş vermiş qəza zamanı itkin düşmüş neftçilərin ailə üzvləri ilə görüşüb.
1news.az SOCAR-ın saytına istinadən xəbər verir ki, əvvəlcə, həlak olan və itkin düşən neftçilər anılıb. SOCAR-ın prezidenti Rövnəq Abdullayev Xəzər dənizində bu cür təbii fəlakətlərin çox nadir hallarda baş verdiyini qeyd edərək qəzadan dərhal sonra Azərbaycan Respublikası Prezidentinin Sərəncamı ilə Dövlət Komissiyasının yaradıldığını bildirib, ötən müddət ərzində Komissiyanın rəhbərliyi altında görülən tədbirlərdən danışıb, həlak olan və itkin düşən neftçilərin axtarış işlərinin fasilə verilmədən aparıldığını söyləyib, son cəsədlərin tapıldığı Türkmənistan Respublikası ərazisində axtarış işlərinin intensivləşdirilməsi ilə bağlı zəruri tədbirlərin həyata keçirildiyini diqqətə çatdırıb.
Bu hadisənin SOCAR ailəsinə daxil olan çoxminli neftçiləri dərindən sarsıtdığını söyləyən şirkət prezidenti həlak olan və itkin düşənlərin bütün neftçilər tərəfindən bir an da olsun unudulmadığını vurğulayıb, onların ailə üzvlərinə qayğı göstərilməsinin daim diqqət mərkəzində saxlanıldığını qeyd edərək bu görüşün də onların qayğı və problemləri ilə maraqlanmaq məqsədi daşıdığını diqqətə çatdırıb. Qəzada xilas edilmiş neftçilərin müalicə-reabilitasiyasına da hərtərəfli dəstək verilməsinə toxunan Rövnəq Abdullayev dövlətimizin rəhbəri İlham Əliyevin göstərişlərinə əsasən, zərər çəkmiş bütün insanların sosial təminatları ilə bağlı məsələlərin bundan sonra da diqqətdə saxlanılacağını vurğulayıb.
İtkin düşənlərin ailə üzvləri ilə SOCAR rəhbərliyi nümayəndələrinin indiyə qədər keçirilmiş görüşləri haqqında məlumatlı olduğunu bildirən Rövnəq Abdullayev görüş işitirakçılarını narahat edən məsələlərlə maraqlanmış, onların arzu və istəklərini dinləyib, suallarına cavab verib. İtkin düşən neftçilərin ailə üzvlərindən Esmira Əhmədova, Hüseyn Xəlilov, Azər İskəndərov, Nəcməddin Nəcməddinov, Simuzər Rzaxanova və başqaları qarşılaşdıqları problemlərdən söz açmış, bu problemlərin həlli üçün SOCAR rəhbərliyinin köməyinə ehtiyac yarandığını söyləyib.
SOCAR-ın prezidenti Rövnəq Abdullayev görüşdə qaldırılan məsələlərin həlli istiqamətində şirkət tərəfindən hər cür dəstək göstəriləcəyini qeyd etmiş, itkin düşənlərin ailə üzvlərinin üzləşdikləri çətinliklərin aradan qalıdırılmasına yardım edilməsinin hər şeydən öncə, vətəndaşlıq borcu olduğunu bildirib. O, dekabrın 4-də təbii fəlakət nəticəsində “Günəşli” yatağındakı 10 və ''Neft Daşları''ndakı 501 nömrəli dəniz özüllərində baş vermiş qəza zamanı həlak olan neftçilərin xatirəsinin əbədiləşdirilməsi üçün abidə qoyulacağını söyləyib, ölənlərə Allahdan rəhmət, itkin düşənlərin ailə üzvlərinə səbr diləyib.
1news.az
