“Qızıl Delviq” Bakıya gedir

Tanınmış Azərbaycan yazıçısı Kamal Abdullanın “Platon deyəsən xəstələnib” adlı hekayələr toplusu Rusiyanın Delviq adına “Sözə və Vətənə sədaqət” mükafatının - “Qızıl Delviq”in qısa siyahısına salınıb.

1news.az-ın məlumatına görə, K.Abdullanın əsəri ilə yanaşı daha 10 əsər 2012-ci ildə “Literaturnaya qazeta” tərəfindən Rusiya illik milli mükafatı kimi təsis edilən Anton Delviq mükafatına layiq görülüb.

Birinci mükafata üç, ikinci mükafata altı əsər layiq görülür. “Debüt” nominasiyasında dörd əsərə diplomlar təqdim olunur.

Qeyd edək ki, K.Abdullanın 2014-cü ildə Moskvada “Xudojestvennaya literatura” nəşriyyatında çap olunmuş “Platon deyəsən xəstələnib...” kitabı münsiflər heyətinin fikrincə, yüksək səviyyədə qələmə alınmaqla yanaşı, cəmiyyətdə baş verən prosesləri daha yaxşı əks etdirir, eləcə də sözə və ədəbi ənənələrə sadiqliyi nümayiş etdirir.

“Modern nəsr” nominasiyasında laureat olan kitabda yazıçının son illər qələmə aldığı hekayələr toplanıb. Hekayələri rus dilinə Azər Mustafazadə tərcümə edib. Ön sözün müəllifi məşhur rus yazıçısı Yuri Polyakovdur.

Onu da bildirək ki, ilk dəfədir ki, xarixi oxucu auditoriyasına yaxşı tanış olan Azərbaycan müəllifinin əsəri beynəlxalq səviyyədə belə yüksək və nüfuzlu mükafata layiq görülür.

1news.az