Bakı - Quba yolunda 6 təkərli “Hummer” yandı – EKSKLÜZİV TƏFƏRRÜATLAR

Bazar günü, martın 20-də Bakı – Quba magistralında, Siyəzən şəhərinin yaxınlığında energetik içkilər istehsal edən “Bizon” şirkətinə məxsus “Hummer” markalı avtomobil yanıb.

Videogörüntülər çoxsaylı şayiə və fərziyyələrin yaranmasına səbəb olduğundan sözügedən şirkətin rəhbərliyi bizimlə əlaqə saxlayaraq hadisənin baş vermə səbəblərinə aydınlıq gətirib.

Hadisənin şahidi olmuş şirkətin əməkdaşlarından biri müxbirimizlə söhbətində sosial şəbəkələrdə yayılan şayiələrin həqiqəti əks etdirmədiyini bildirdi.

“Həmin hadisəyə qədər avtomobil ideal vəziyyətdə idi. Onun işləmə qrafiki bir neçə ay müddətinə saatlar üzrə müəyyən olunmuşdu. Avtomobilin salonunda quraşdırılmış videoregistratorun da qeydə aldığı kimi hər şey anidən baş verdi. Avtomobilin sürücüsü və sərnişini yanğın baş verdiyini o dəqiqə anlamadılar, həyatlarına təhlükənin olduğunu gördükdə isə avtomobili yolun kənarına çəkərək tez onu tərk etdilər. Hadisədən bir qədər öncə avtomobilə bir çən – 120 litr benzin vurlmuşdu, ona görə də hər an partlayış ola bilərdi”- deyə, şirkətin əməkdaşı qeyd edib.

“Bu yaxınlarda avtomobil GM şirkətində texniki baxışdan keçib, bəzi hissələri dəyişdirilib. Əlbəttə ki, bizim üçün önəmli olanı hadisə zamanı əməkdaşlarımızdan və yol hərəkəti iştirakçılarından kiminsə xəsarət almamasıdır. İnsan həyatı istənilən maddi dəyərdən yüksəkdir”- deyə, şirkətin əməkdaşı vurğulayıb.

Yanan avtomobilin salonunda quraşdırılmış videoregistrator tərəfindən qeydı alınmış və hadisə şahidlərinin biri tərəfindən çəkilmiş videogörüntüləri təqdim edirik:

1news.az