Ermənistan XİN-i Dağlıq Qarabağ məsələsini AŞ-ın baş katibi və ATƏT-in fəaliyyətdə olan sədri ilə müzakirə edib
Ermənistanın xarici işlər naziri Edvard Nalbandyan ATƏT-in fəaliyyətdə olan sədri, Almaniyanın xari işlər naziri Frank-Valter Ştaynmayerlə telefon danışığı aparıb.
1news.az Armenia Today-ə istinadla xəbər verir ki, bu haqda Ermənistan XİN-in mətbuat katibi Tiqran Balayan öz Twitter mikrobloqunda qeyd edib.
Məluamatda qeyd olunur ki, tərəflər münaqişə zonasında erməni işğalçı qüvvələri tərəfindən gərginliyin artmasının təhrikini müzakirə ediblər. Daha əvvəl, Almaniyanın xari işlər naziri Dağlıq Qarabağda münaqişə zonasında hərbi əməliyyatların dayandırılmasını və atəşkəs rejiminə əməl edilməsinə çağırmışdı.
Edvard Nalbandyan həmçinin Avropa Şurasının baş katibi Torbern Yaqlandla da danışıqlar aparıb.
Xatırladaq ki, hərbi cəhətdən iflasa uğrayan Ermənistan kriminal rejimi son vaxtlar cəbhədəki uğursuzluqlarının, canlı qüvvə və döyüş texnikası sarıdan xeyli itkisinin əvəzini çıxmaq məqsədilə növbəti dəfə təxribat törətməyə çalışıb.
Aprelin 2-nə keçən gecə bütün cəbhəboyu mövqelərimiz iriçaplı silahlar, minaatanlar, qumbaraatan və artilleriya qurğularından intensiv atəşə tutulub. Eyni vaxtda qoşunların təmas xəttinə yaxın mülki əhalinin kompakt yaşadığı bir sıra yaşayış məntəqələri də düşmən atəşinə məruz qalıb. Qarşı tərəfin hərbi aktivliyini genişləndirməyə imkan verməmək, onun fəaliyyətinin qarşısını almaq məqsədilə Silahlı Qüvvələrimizin komandanlığı tərəfindən əməliyyat şəraiti qiymətləndirilərək dərhal cavab tədbirlərinin görülməsi üçün qərar verilib.
Cəbhənin ən gərgin Ağdərə-Tərtər-Ağdam və Xocavənd-Füzuli istiqamətində yerləşən birliklər, artilleriya bölmələri və digər qoşun növlərinin birgə, əlaqəli fəaliyyəti nəticəsində qısa müddətdə Ermənistan silahlı bölmələrinə qarşı cavab tədbirləri həyata keçirilir.
Müdafiə Nazirliyi bəyan edib ki, cəbhəboyu zonada baş verən hadisələrlə bağlı mətbuata və ictimaiyyətə əlavə məlumat veriləcək və kütləvi informasiya vasitələri nümayəndələrini rəsmi olmayan, dəqiqləşdirilməmiş və qeyri-obyektiv məlumatlardan istifadə etməməyə çağırır.
Bundan əlavə, Müdafiə Nazirliyi Ermənistanın bəzi kütləvi informasiya vasitələrində guya Azərbaycan Hərbi Hava Qüvvələrinə məxsus helikopterin vurulması barədə yayılan məlumatlar kökündən yalandır, təxribat xarakterlidir və dezinformasiya məqsədi daşıyır.
1news.az
