Mart ayında 1 ədəd piyada və 2 ədəd tank əleyhinə mina zərərsizləşdirilib
Keçən ay Azərbaycanda 1 ədəd piyada və 2 ədəd tank əleyhinə mina aşkar edilərək zərərsizləşdirilib.
Bu barədə 1news.az-a məlumat Azərbaycan Ərazilərinin Minalardan Təmizlənməsi üzrə Milli Agentliyin (ANAMA) mətbuat xidmətindən verilib. Qeyd olunub ki, minalardan əlavə 701 ədəd partlamamış hərbi sursat (PHS) da aşkarlanaraq zərərsizləşdirilib.
Məlumata görə, keçən ay ərzində 1,762,402 kvadrat metr ərazi yoxlanılıb, mina və partlamamış hərbi sursatdan təmizlənib.
Mart ayı ərzində 1 mina/PHS hadisəsi qeydə alınıb.
Hazırda əməliyyatlarda 507 nəfər əməliyyat heyəti və 126 nəfər inzibati heyət iştirak edir. Həmçinin əməliyyatlara 6 mexaniki minatəmizləmə maşını və 39 minaaxtaran it cəlb edilib.
Qeyd edək ki, indiyədək cəmi 320,443,366 kvadrat metr ərazi təmizlənib. Tapılıb zərərsizləşdirilmiş mina və PHS-lərin sayı isə 716,307-dir.
Agentlik tərəfindən təmizləmə əməliyyatları Gəncə şəhəri, Abşeron, Ağdam, Ağstafa, Füzuli, Gədəbəy, Goranboy, Qazax, Tərtər, Tovuz, Samux rayonlarında və eləcə də Qaradağ rayonunun Güzdək qəsəbəsində davam etdirilir.
1news.az
