SAM-ın nümayəndə heyəti Türkiyədə üçtərəfli konfransda iştirak edib

Prezident yanında Strateji Araşdırmalar Mərkəzinin (SAM) nümayəndə heyəti “Türkiyə-Azərbaycan-Gürcüstan - Enerji təhlükəsizliyi, Nəqliyyat və Nəqliyyat dəhlizləri” mövzusunda üçtərəfli konfransda iştirak etmək üçün Türkiyədə səfərdə olub

1news.az-ın məlumatına görə, nümayəndə heyətinin tərkibinə direktoru Fərhad Məmmədov və SAM-ın Xarici Siyasət Məsələlərinin Təhlili şöbəsinin müdiri Cavid Vəliyev daxil olub.

Türkiyə Respublikası Xarici İşlər Nazirliyi yanında Strateji Araşdırmalar Mərkəzi, Strateji və Beynəlxalq Münasibətlər üzrə Gürcüstan Fondu (GFSIS) və SAM-ın birgə təşkil etdiyi tədbir “Enerji və Enerji təhlükəsizliyində yeni dinamika”, “Nəqliyyat dəhlizlərinin genişləndirilməsi” və “İpək Yolu və Kəməri təşəbbüsü” və “Orta Dəhliz Layihəsi” boyu imkanlar” mövzulu üç paneldən ibarət olub.

Türkiyənin paytaxtı Ankarada keçirilən konfransda SAM-ın direktoru Fərhad Məmmədov, SAM-ın Xarici Siyasət Məsələlərinin Təhlili şöbəsinin müdiri Cavid Vəliyev, Türkiyə Respublikası Xarici İşlər Nazirliyi Strateji Araşdırmalar Mərkəzinin Direktoru Ali Resul Usul,  Gürcüstan Strateji və Beynəlxalq Araşdırmalar Fondunun Prezidenti Yekaterina Metreveli, Azərbaycan Respublikası Dövlət Dəmiryolları Tarif Siyasəti və Marketinq İdarəsinin rəis müavini Cavid Quliyev, Azərbaycan Respublikası Enerji Nazirliyinin əməkdaşı Məhərrəm Vəliyev, Türkiyənin Medipol Universitetindən professor Mərt Bilgin, Gürcüstan Respublikası GFSİS nümayəndəsi Şota Utiaşvili, Türkiyə Yaxın Şərq Texniki Universitetinin professoru Oktay Tanrısevər, Türkiyə Respublikası Xarici İşlər Nazirliyinin əməkdaşı Koray Tarqay və başqaları məruzələrlə çıxış ediblər.

1news.az