Bakıda keçiriləcək beynəlxalq tədbirlərdə idmançılara və azarkeşlərə yardım üçün yeni təcili yardım avtomobilləri alınıb

Bu il Bakıda keçiriləcək yeniyetmələr arasında beynəlxalq futbol çempionatı və Formula - 1 yarışlarında idmançılara, xarici ölkələrdən gələn azarkeşlərə və tamaşaçılara ilkin tibbi yardım etmək üçün Bakı şəhər Təcili və Təxirəsalınmaz Tibbi Yardım Stansiyasının tibbi heyətinin hazırlıq məşğələlərinin keçirilməsi nəzərdə tutulub.

1news.az APA-ya istinadən xəbər verir ki, bunu Bakı şəhər Təcili və Təxirəsalınmaz Tibbi Yardım Stansiyasının baş həkimi Rauf Nağıyev bildirib. R. Nağıyev deyib iki, Bakıda keçiriləcək beynəlxalq səviyyəli tədbirlərdə təcili və təxirəsalınmaz tibbi yardım xidmətini yüksək səviyyədə təşkili məqsədi ilə zəruri işlər görülür.

Onun sözlərinə görə, həmin tədbirlər üçün Bakıya 100 yeni müasir avadanlıqlarla təchiz olunan təcili yardım avtomobillər gətirilib. R.Nağıyev qeyd edib ki, yarışlarda hər kəsə təcili yardım göstərmək üçün kifayət qədər həkim briqadası var: "Ehtiyac olarsa, əlavə həkim briqadaları da bu işə cəlb edilə bilər. "Bakı-2015" Avropa Oyunlarında stansiya bölmələrinin 200-ə yaxın seçilmiş həkimi təlim kurslarına cəlb olunub. Bu il keçiriləcək beynəlxalq yarışlarda da həmin heyət yenidən təlimlərə cəlb ediləcək, onların xidmətlərindən istifadə olunacaq".

1news.az