IDEA Yer Gününü gənclərlə birgə qeyd edib- FOTO

IDEA İctimai Birliyi Beynəlxalq Yer Günü ilə əlaqədar təlim keçirib.

1news.az AZƏRTAC-a istinadən xəbər verir ki, IDEA-nın Zirə Mədəniyyət Mərkəzində yerləşən Resurs Mərkəzində keçirilən təlimdə ətraf mühit, ekologiya və davamlı inkişaf sahələri üzrə təhsil alan və ya bu sahələrdə çalışan 40 nəfərə yaxın gənc iştirak edib.

Təlimin nəzəri hissəsində ağac və kol bitkilərinin, müxtəlif növ güllərin düzgün əkilmə qaydaları, ağacların calaq edilməsi və təhlükəsiz qaydada budanması, gübrələmə prosesi ilə bağlı məlumatlar verilib. Yekunda mövzu ətrafında müzakirələr aparılıb.

Praktiki hissədə iştirakçıların Zirə Mədəniyyət Mərkəzindəki Ekoparka, həmçinin Quş parkına infoturu təşkil olunub. Daha sonra gənclərlə birgə Ekoparkın ərazisində ağaclar və müxtəlif güllər əkilib, yaşıllıqlara qulluq göstərilib.

Təlim iştirakçılar tərəfindən böyük maraqla qarşılanıb.

IDEA mütəmadi olaraq ətraf mühit və davamlı inkişaf sahələrində təhsil alan gənclərin ekoloji biliklərini artırmaq, onların diqqətini ekoloji problemlərin həllinə yönəltmək məqsədilə hər ay təlimlər, seminarlar və kurslar təşkil edir.

1news.az