Azərbaycanla Türkiyə arasında səhiyyə və tibb elmi sahəsində əməkdaşlığa dair saziş imzalanıb

Aprelin 26-da səhiyyə naziri Oqtay Şirəliyev Türkiyənin səhiyyə naziri Məhmət Müəzzinoğlunun rəhbərlik etdiyi nümayəndə heyətini qəbul edib.

1news.az-ın məlumatına görə, O.Şirəliyev iki ölkə arasındakı dostluq və qardaşlıq münasibətləri dərin tarixi köklərə malik olduğunu bildirdi. Nazir qeyd etdi ki, Azərbaycanla Türkiyə arasında siyasi, iqtisadi, səhiyyə, elm və təhsil, mədəni və beləliklə də bütün sahələrdə əlaqələr yüksələn xətlə inkişaf edir.

O.Şirəliyev ölkələrimiz arasında səhiyyə və tibb elmi sahəsində əlaqələrin müstəqilliyimizin ilk illərinə təsadüf etdiyini xatırlatdı. Qeyd olundu ki, ölkələrimiz arasında səhiyyə və tibb elmi sahəsində əməkdaşlıq Protokolu 1994-cü ildə imzalanıb. Sənədə əsasən hər iki ölkənin tibb universitetləri, həkimləri, təkmilləşdirmə institutları, səhiyyə müəssisələri arasında əlaqələr qurulmuş və Protokolun bütün müddəaları layiqincə yerinə yetirilib.

Hazırda səhiyyəmizin elə bir sahəsi yoxdur ki, orada türkiyəli mütəxəssislərlə əməkdaşlıq qurulmasın. Mütəxəssis mübadiləsi, birgə elmi-təhqiqatlar, əczaçılıq, icbari tibbi sığorta, səhiyyənin maliyyələşməsi və bu kimi bir çox sahələrin tətbiqində Türkiyənin təcrübəsinə böyük önəm verilib. Nazir onu da vurğuladı ki, bu gün imzalanacaq Saziş gələcəkdə əməkdaşlığın genişləndirilməsinə vəsilə olacaq. Qeyd edib ki, hazırda azərbaycanlı mütəxəssislər türkiyəli həmkarları ilə yanaşı ölkəmizdə “Sağlamlıq həftəsi” çərçivəsində birgə əməliyyatlar həyata keçirirlər. Bu da bir daha dostluq və qardaşlıq münasibətlərinin bariz nümunəsidir.

Nümayəndə heyəti adından səmimi qəbula görə minnətdarlığını bildirən türkiyəli nazir M.Müəzzinoğlu özlərini sanki Vətənlərindəki kimi hiss etdiklərini bildirib. Türkiyəli nazir bu görüşün Bakıda yüksək səviyyədə təşkil olunmuş BMT-nin Sivilizasiyalar Alyansının VII Qlobal Foruma təsadüf etdiyini məmnunluqla qeyd etdi və vurğuladı ki, Forumun istər son dövrlərdə Türkiyədə törədilmiş terror hadisələri, istərsə də Dağlıq Qarabağ münaqişəsinin gərginləşdiyi bir zamanda keçirilməsi çox önəmlidir. Belə qarşılıqlı görüşlər ölkələrimiz arasındakı dostluq və qardaşlığın əbədi olacağının bariz nümunəsidir.

Daha sonra türkiyəli nazir ölkəsinin tibb elmi sahəsindəki təcrübəsindən, ailə həkimlərinin iş prinsipindən, “Türk Sağlıq bilimləri” Universitetinin fəaliyyətindən danışdı.

Görüşün sonunda nazir O.Şirəliyev və Türkiyənin səhiyyə naziri M.Müəzzinoğlu səhiyyə və tibb elmi sahəsində əməkdaşlığa dair sazişi imzaladılar.

1news.az