Müdafiə Nazirliyi: Erməni tərəfinin Azərbaycan SQ-nın itkiləri ilə bağlı yaydığı audioyazı – saxtadır
Azərbaycan Müdafiə Nazirliyi ermənilərin Azərbaycan Silahlı Qüvvələrinin (SQ) itkilərlə bağlı yaydığı telefon audioyazısına aydınlıq gətirib.
1news.az-a Azərbaycan Müdafiə Nazirliyinin mətbuat xidmətindən verilən məlumata görə, erməni tərəfinin Azərbaycan Ordusunun itkilərlə bağlı yaydığı audioyazı saxtadır.
“Artıq neçənci dəfədir ki, onlar bu cür audioyazı yayırlar. Hazırki audioyazı Ermənistan hərbi-kriminal rejiminin xəstə təxəyyülüdür”, - nazirlikdə bildirdilər.
Həmçinin hərbi qurumda bildirildi ki, Azərbaycan tərəfi heç bir itki verməyib və düşmənin yaydığı bu məlumat kökündən yalandır:
“Hazırda qoşunların təmas xəttində vəziyyət stabildir. Azərbaycan SQ əməliyyat şəraitinə tamamilə nəzarət edir”.
Qeyd edək ki, erməni KİV-i Azərbaycan Ordusunun guya böyük itkilərlə müşahidə olunan audioyazını yaymışdı.
Xatırladaq ki, aprelin 2-dən 5-nə kimi Azərbaycan-Ermənistan qoşunların təmas xəttində atəşkəs müqaviləsi imzalandıqdan indiyədək son 22 ilin ən irimiqyaslı döyüşləri baş verdi. Azərbaycan Silahlı Qüvvələri tərəfindən erməni silahlı qüvvələrinin ilk müdafiə xətti aşıldı və bir sıra strateji yüksəkliklər, həmçinin yaşayış məntəqələri üzərində nəzarət ələ keçdi.
Aprelin 5-də saat 12:00-dan etibarən təmas xəttində hərbi əməliyyatlar dayandırılıb.
1news.az
