Gəncədə Avropa Gənclər Paytaxtları Şəbəkəsinin gələcək fəaliyyət planı müzakirə olunub - FOTO

“Gəncə-2016-cı il Avropa Gənclər Paytaxtı” layihəsi çərçivəsində mayın 5-də Avropa Gənclər Paytaxtları Şəbəkəsinin görüşü keçirilib.

1news.az-ın AZƏRTAC-a istinadla verdiyi xəbərə görə, görüşün moderatoru Avropa Gənclər Paytaxtları Şəbəkəsinin baş katibi Andras Farkas Gəncənin 2016-cı il üçün Avropanın Gənclər Paytaxtı seçilməsi ilə bağlı keçirilən tədbirlərin faydalı və maraqlı olduğunu bildirib. O, təşkilatçılığın yüksək səviyyədə olduğunu xüsusi qeyd edib.

Sonra “Gəncə Avropa Gənclər Paytaxtı-2016” İctimai Birliyinin sədri Elmir Vəliyev Gəncənin bu ada layiq görülməsindən fəxr etdiyini bildirib, layihə çərçivəsində həyata keçiriləcək işlərdən danışıb. İl ərzində bununla bağlı bir sıra tədbirlərin keçiriləcəyini vurğulayan Elmir Vəliyev Gəncənin Avropanın Gənclər Paytaxtı adına layiq görülməsində ölkəmizin beynəlxalq nüfuzunun rolunu qeyd edib.

İctimai Birliyin sədri əsası ulu öndər Heydər Əliyev tərəfindən qoyulan və Prezident İlham Əliyevin uğurla həyata keçirdiyi regionların inkişafı və gənclər siyasəti barədə də məlumat verib.

Digər şəhərlərin nümayəndələri də tədbirlərin yüksək səviyyədə keçirildiyini vurğulayıb, bu cür görüşlərin əhəmiyyətindən danışıb, Gəncədə onlara göstərilən qonaqpərvərlikdən razılıqlarını ifadə ediblər.

Görüşdə Avropa Gənclər Paytaxtları Şəbəkəsinin gələcək fəaliyyət planı müzakirə olunub, qarşıda duran vəzifələr ətrafında fikir mübadiləsi aparılıb.

1news.az