“Şahin” hərbi-idman oyununun respublika final yarışı keçiriləcək

9-10 may tarixlərində “Şahin” hərbi-idman oyununun respublika final yarışı keçiriləcək.

Gənclər və İdman Nazirliyindən 1news.az-a verilən məlumata görə, tədbirin proqramına əsasən 9 may saat 16:00-dan 17:00-dək iştirakçı komandalar Fəxri Xiyabanda ümummilli lider Heydər Əliyevin məzarını və Şəhidlər Xiyabanını ziyarət edəcəklər.

10 may saat 10:00-da Silahlı Qüvvələrin Təlim və Tədris Mərkəzində “Şahin” hərbi-idman oyununun respublika final yarışının açılış mərasimi keçiriləcək və yarışının qalibləri həmin gün müəyyənləşəcək.

Qeyd edək ki, 1996-cı ildən keçirilən “Şahin” hərbi-idman oyununda VIII və X sinif şagirdləri iştirak edir. Komandalar yarışın 8 mərhələsi üzrə öz qüvvələrini sınayırlar.

Bakı şəhəri üzrə keçirilən zona birinciliyində I,II və III yerləri tutmuş komandalar, digər 8 zonanın hər birindən isə I və II yerləri tutmuş komandalar respublika final yarışında iştirak etmək hüququ qazanırlar.

Komandanın tərkibi 14 nəfərdən (10 oğlan 4 qız) ibarətdir. Final yarışında 19 komandanın iştirakı nəzərdə tutulub. Bu tədris ilində oyunların keçirilməsinin 20 illiyi tamam olur.

1news.az