Azərbaycan və İran aqrar sahədə əməkdaşlığı genişləndirir
Mayın 17-də iqtisadiyyat naziri Şahin Mustafayev İran İslam Respublikasının kənd təsərrüfatı naziri Mahmud Höccəti ilə görüşüb.
1news.az-ın məlumatına görə, görüşdə ölkələrimiz arasında əməkdaşlığın yüksək səviyyədə olmasından və əlaqələrin müxtəlif sahələrdə uğurla davam etməsindən məmnunluq ifadə olunub, kənd təsərrüfatı sahəsində əməkdaşlıq imkanlarına dair fikir mübadiləsi aparılıb.
Nazir Ş.Mustafayev qeyd edib ki, Azərbaycan və İran prezidentlərinin əlaqələrin daha da genişləndirilməsi istiqamətində göstərdiyi birgə səylər nəticəsində ölkələrimiz arasında neft-qaz, nəqliyyat, enerji, rabitə və s. sahələrdə əməkdaşlıq uğurla davam edir. Kənd təsərrüfatı Azərbaycan-İran əməkdaşlığının vacib istiqamətlərindən biridir və bu sahədə əlaqələrin genişləndirilməsi üçün geniş imkanlar var. Mövcud imkanları reallaşdırmaq məqsədilə Hökumətlərarası Komissiya çərçivəsində aqrar sahə üzrə İşçi Qrupu fəaliyyət göstərir və İşçi Qrupunun ilk iclası 2015-ci ildə keçirilib.
Nazir Ş.Mustafayev qeyd edib ki, Azərbaycanda bitki və heyvanlar üçün dərman preparatlarının istehsalına dair birgə müəssisə yaradıla, iranlı ixracatçılar Azərbaycanın Aktau şəhərindəki Logistik Mərkəzindən istifadə edə bilər. Bundan başqa, Azərbaycan pambıqçılıq, toxumçuluq və tingçilik sahələrində əməkdaşlıqda, eləcə də meyvə qurudulması sahəsində İran təcrübəsinin öyrənilməsində və ölkəmizdə meyvəqurutma müəssisələrinin yaradılmasında, İrandan kənd təsərrüfatı texnikasının alınması sahəsində əməkdaşlıqda maraqlıdır.
İran İslam Respublikasının kənd təsərrüfatı naziri M.Höccəti hər iki ölkənin kənd təsərrüfatı sahəsində böyük potensiala malik olduğunu və aqrar sahədə əməkdaşlığın genişləndirilməsi üçün mövcud potensialdan səmərəli istifadə olunmasının əhəmiyyətini qeyd edib. Vurğulanıb ki, ölkələrimiz arasında ticarət əlaqələri genişləndirilməklə 3-cü ölkələrə birgə ixrac həyata keçirilə bilər.
M.Höccəti iranlı fermerlərin Azərbaycanda müştərək və ya uzunmüddətli torpaq icarəyə götürərək xüsusi tələbat olan məhsulların əkilməsində, birgə investisiya qoyuluşunda maraqlı olduğunu diqqətə çatdırıb.
1news.az
