Meksikanın Azərbaycandakı səfiri Qəbələyə səfər edib - FOTO

Meksika Birləşmiş Ştatlarının Azərbaycandakı səfiri Xuan Rodrigo Labardini Flores tanışlıq məqsədilə Qəbələ rayonuna səfər edib.

1news.az-ın verdiyi xəbərə görə, Qəbələ Rayon İcra Hakimiyyətinin başçısı Səbuhi Abdullayev səfirə rayonun tarixi, iqtisadi vəziyyəti, sosial və mədəni həyatı barədə ətraflı məlumat verib.

Qeyd olunub ki, füsunkar təbiət qoynunda yerləşən bu gözəl məkan beynəlxalq və irimiqyaslı tədbirlərə ev sahibliyi edir. Müntəzəm olaraq Qəbələdə keçirilən mühüm əhəmiyyətli tədbirlər burada sürətli inkişafa zəmin yaradır. Bildirilib ki, rayonda mövcud olan istehsal müəssisələrinin fəaliyyəti bölgənin inkişaf dinamikasının tərkib hissəsidir. Diqqətə çatdırılıb ki, bu gün Qəbələ rayonunda turizm infrastrukturunun inkişafı başlıca və mühüm sahələrdən biri hesab olunur. Qəbələdə yaradılan əlverişli şəraitin nəticəsidir ki, buraya dincəlmək üçün səfər edən turistlərin sayı ildən-ilə xeyli artır.

Ölkələrimiz arasında əməkdaşlığın inkişaf etdirilməsi və güclü tərəfdaşlıq əlaqələrinin qurulması üçün yaxşı imkanların mövcud olduğunu qeyd edən səfir Azərbaycanda gedən sürətli iqtisadi inkişaf proseslərinin onda dərin təəssürat yaratdığını və bu inkişaf mərhələsinin Qəbələ rayonuna da təsirsiz ötüşmədiyini vurğulayıb. Qonaq turizm sahəsindəki əməkdaşlıq haqqında fikirlərini bölüşərkən ölkəmizin qonaqpərvərliyi ilə dünyada tanındığını bildirib.

Görüşdə bir sıra sahələrdə əməkdaşlığın perspektivləri barədə fikir mübadiləsi aparılıb.

Daha sonra səfir Heydər Əliyev Mərkəzi, tarix-diyarşünaslıq muzeyi, Qəbələ konserv zavodu, eləcə də rayonun digər tarixi mədəni məkanları, sənaye müəssisələri və turizm sektoru ilə yaxından tanış olub.

1news.az