Novruz Məmmədov: “Ermənilərin törətdikləri təxribatlardan sonra dünya gördü ki, Dağlıq Qarabağ dondurulmuş münaqişə deyil – VİDEO
“Ermənilərin törətdikləri təxribatlardan sonra dünya gördü ki, Dağlıq Qarabağ dondurulmuş münaqişə deyil”.
Bu haqda Azərbaycan Prezident Administrasiyası rəhbərinin müavini, Xarici əlaqələr şöbəsinin müdiri Novruz Məmmədov ANS telekanalının “Hesabat” proqramına müsahibəsində deyib.
N.Məmmədovun sözlərinə görə, Dağlıq Qarabağ münaqişəsinin nizamlanmasında son dövrlərdə qeydə alınan canlanmanın bir neçə səbəbi var:
“Çoxları belə bir fikir formalaşdırmaq istəyirlər ki, guya Dağlıq Qarabağ dondurulmuş münaqişədir. Lakin son hadisələr zamanı ermənilərin törətdikləri təxribatlarla bağlı dünya gördü ki, bu münaqişə heç də dondurulmuş deyil və birdən-birə alışıb yana bilər”.
Qeyd etmək lazımdır ki, aprelin əvvəlində Azərbaycan SQ ermənilərin təxribatına cavab olaraq uğurlu hərbi əməliyyat həyata keçirdi və bir sıra strateji cəhətdən əhəməiyyətli yüksəklikləri işğaldan azad etdi.
Mövzu ilə əlaqədar oxuyun:
N.Məmmədov qeyd edib ki, bundan əlavə, Azərbaycan Prezidentinin müxtəlif ölkələrə - Avropa İttifaqı, ABŞ, Rusiya, Türkiyə, İran kimi mühüm ölkələrə münasibətdə apardığı siyasət, həmin ölkələrə səfərləri, aparılan daşınıqlar və bu səfərlər zamanı əldə olunan nəticələr ümumi bir mövqeyə - artıq, demək olar, 25 ildir davam edən münaqişənin həlli vaxtının gəlib çatdığı mövqeyinə gətirib çıxartdı:
“Buna görə də bu münaqişənin həllinə bu gün çox böyük diqqət var. Aprel hadisələrindən sonra ABŞ-ın təşəbbüsü ilə Vyana görüşü keçirildi, eyni zamanda müxtəlif görüşlərdə həm Rusiya, həm də Fransa tərəfi münaqişənin nizamlanması ilə bağlı danışıqlara başlamağın, yeni bir mərhələyə qədəm qoymağın vacib olduğunu qeyd etdilər. İndi həm ATƏT-in Minsk qrupunun həmsədr dövlətlərinin, həm də həmsədrlərin özlərinin mövqeyinə baxanda görmək olur ki, irəliyə bir addım atmaq niyyəti var”.
İyunun 20-də Sankt-Peterburqda Rusiya, Azərbaycan və Ermənistan prezidentlərinin Dağlıq Qarabağ münaqişəsi üzrə üçtərəfli görüşü baş tutdu. Görüş danışıqlar prosesinin intensivləşdirilməsi, eləcə də Ermənistanın bu status-kvonu saxlamaq imkanına malik olmadığı sübut etdi.
Aprelin əvvəlində Azərbaycan SQ-nin qərarlı fəaliyyəti nəticəsində bir sıra strateji əhəmiyyətli ərazilər erməni işğalından azad edildi. Əgər İrəvan təxribatları dayandırmazsa və danışıqlar masasına əyləşərək hadisələri ölü nöqtədən irəlilətməzsə, bu, bütün dünyaya müharibə riskinin yeni dalğasını nümayiş etdirə bilər.
Yekunda məlum oldu ki, Vladimir Putin, İlham Əliyev və Serj Sarkisyan danışıqlar prosesinə əlavə təkan verərək, eləcə də təmas xəttində ATƏT-in müşahidəçilərinin sayını artmağa razılaşdılar.
Almaniyanın XİN rəhbəri Frank-Valter Ştayenmayerin Bakıya səfərindən danışarkən N.Məmmədov bildirib ki, Almaniya bu məsələdə bir iş görməyə, addım atmağa çalışır:
“Bundan əlavə, Azərbaycan Prezidentinin bir qədər əvvəl Almaniyaya səfəri zamanı bu məsələ Almaniya Kansleri ilə, nümayəndə heyətləri ilə çox geniş şəkildə müzakirə olundu. Azərbaycan Prezidenti orada mövqeyini açıqladı, münaqişənin ədalətli həlli yolunu açıb göstərdi, izah etdi, əsaslandırdı. Düşünürəm, bunun nəticəsi olaraq Almaniyanın xarici işlər naziri bu regiona səfər etdi”.
Qeyd edək ki, ATƏT-in Minsk qrupu Ermənistan və Azərbaycan arasında Dağlıq Qarabağ münaqişəsinin nizamlanması prosesində əsas danışıqlar platformasıdır. Lakin həmsədrlərin bütün səylərinə bamayaraq münaqişə 20 ildən artıqdır ki, həll olunmayaraq qalır.
Dağlıq Qarabağ və ona bitişik yeddi rayon - Azərbaycanın 20% ərazisi erməni silahlı qüvvələrinin işğalı altındadır.
Erməni silahlı qüvvələrinin Azərbaycanın işğal olunmuş ərazilərindən çıxarılması üçün BMT Təhlükəsizlik Şurasının dörd qətnaməsi irəli sürülsə də, erməni tərəfi buna məhəl qoymayır.
1news.az
