Mübariz Əhmədoğlu: Sarkisyanın Putini növbəti inkarı Ermənistan və Rusiyadakı ermənilər üçün çox baha başa gələ bilər
Yerevanda Serj Sarkisyanın Rusiyanın xarici işlər naziri Sergey Lavrovu qəbul etməməsi onun Sankt-Peterburq görüşünə münasibətinin göstəricisidir.
1news.az-ın məlumatına görə, bunu Siyasi İnnovasiya və Texnologiyalar Mərkəzinin direktoru, politoloq Mübariz Əhmədoğlu Ermənistan prezidenti Serj Sarkisyanın Rusiyanın xarici işlər naziri Sergey Lavrovu qəbul etməməsini şərh edərkən deyib:
“Rusiya XİN rəhbəri S.Lavrov KTMT-nin tədbirində iştirak etmək məqsədi ilə Yerevanda oldu. Onun S.Sarkisyanla Sankt-Peterburq görüşündə sonadək razılaşdırılmamış məsələlərin razılaşdırılması da planlaşdırılmışdı. Sankt-Peterburq görüşü zamanı bəzi məsələlər məxfi saxlanıldığı üçün prezident S.Sarkisyanla Rusiyanın xarici işlər naziri S.Lavrovun görüşü də ikitərəfli və məxfi olmalı idi. Ona görə, KTMT tədbiri çərçivəsində S.Lavrovun KTMT xarici işlər nazirlərinin kollektivi ilə birlikdə S.Sarkisyanla görüşməsini Dağlıq Qarabağ münaqişəsinin tənzimlənməsi üçün Sankt-Peterburq görüşü kontekstindən əhəmiyyətsiz hesab edirik.
S.Sarkisyan görüşdən imtina etdi. Bəlkə də S.Lavrov-Kələntaryan belə görüşün baş tutmasına ciddi səy göstərmədi. Çünki Sankt-Peterburq görüşünün mahiyyəti Dağlıq Qarabağ münaqişəsinin mərhələli yolla həllini diktə edir. Bu isə təkcə S.Sarkisyan deyil, dünya erməniliyi, o cümlədən də S.Lavrov üçün də ağrılıdır.
Ola bilər, Varşavada NATO sammiti müstəvisində Azərbaycan və Ermənistan prezidentlərinin ABŞ rəhbərliyinin təşkilatçılığı ilə gözlənilən görüşünü S.Sarkisyan S.Lavrovu qəbul etməmək üçün bəhanə hesab edib”.
Siyasətə təsadüfən gəlmiş S.Sarkisyanın xalq məsuliyyətini daşıya bilən şəxs olmadığını deyən M.Əhmədoğlu onu mağara millətçiliyinin daşıyıcısı adlandırıb:
“S.Sarkisyan erməni xalqının tarixində heç bir rolu olmayan şəxsdir. Hətta onun doğum yeri dəqiq bəlli deyil. Bu Ermənistan SSR-nin Gorus rayonunda, yoxsa Azərbaycan SSR-nin Xankəndi şəhərində anadan olub. S.Sərkisyan mağara millətçiliyinin daşıyıcısıdır”.
S.Sarkisyanın qərar qəbul etmək gücündə olmadığını deyən politoloqun sözlərinə görə, Ermənistan prezidentinə hazırda ən yaxşı kömək edən V.Putindir:
“Amma Rusiya erməniliyi də S.Sarkisyana kömək etsəydilər, V.Putinin işi bir az asanlaşardı. Putinin S.Sarkisyana köməkdə işinin asanlaşması Rusiyadakı ermənilər üçün, o cümlədən Ermənistan üçün həyati əhəmiyyətlidir. Rusiya fövqəldövlətdir. Rusiya Cənubu Qafqazda “Ermənistan” adlı dövlətin yaradıcısıdır. Rusiya erməniləri İrandan, Türkiyədən Azərbaycan ərazisinə - Dağlıq Qarabağa köçürən dövlətdir. Zəngəzuru məhz Stalin Ermənistana verdi. Belə tarix Rusiyaya bu regionda yaşayan ermənilərlə hər cür rəftar etməsinə tarixi əsas yaradır.
Ermənistan prezidenti S.Sərkisyanın Rusiya prezidenti V.Putini inkar etməsinin sayı 3-ə çatdı. S.Sarkisyan artıq Putini bezdirir. Putin S.Sarkisyanın Dağlıq Qarabağ tənzimlənməsindəki oynadığı rola şübhə ilə yanaşa bilər.
S.Sarkisyanın RF prezidenti V.Putini 3-cü inkarı Ermənistan dövləti, eləcə də Rusiyadakı ermənilər üçün çox baha başa gələ bilər”.
1news.az
