“Ekoloji İncəsənət” layihəsi başlayır
“İRƏLİ” İctimai Birliyi Azərbaycan Respuiblikası Gənclər Fondunun dəstəyi ilə “Ekoloji İncəsənət” layihəsinə start verir.
Təşkilatdan 1news.az-a verilən məlumata görə, “Ekoloji İncəsənət" layihəsinin əsas məqsədi gənclərin ekoloji sahədə maarifləndirilməsi, ekoloji təmizliyin insanların sağlamlığına olan müsbət təsiri, ətraf mühitin mühafizəsi və məişət tullantılarının düzgün idarə olunması məsələləri haqqında gənclər arasında informasiyanın yayılmasına dəstək olmaqdır.
Həmçinin tullantıların təkrar emalı və onlardan hazırlanan incəsənət nümunələrini gənclərə nümayiş etdirmək əsas məqsədlərdən biridir. Bu layihə zamanı ora toplaşan gənclərin də fikirləri alınacaq və gələcəkdə görüləcək tədbirlər zamanı bu fikirlər də əsas sayılacaq.
Qeyd edək ki, layihə çərçivəsində seçilmiş 30 gəncə müxtəlif ekoloji mövzularda təlim və seminarların keçirilməsi nəzərdə tutulub.
Layihənin ilkin mərhələsi 17-24 sentyabr tarixlərində həyata keçiriləcək. Növbəti mərhələdə sərgi keçirilməsi planlaşdırılır.
1news.az
