Gülşən Paşayeva: Avropa İttifaqı Dağlıq Qarabağ münaqişəsinin nizamlanmasında həlledici amilləri müəyyənləşdirməlidir
Aİ bir tərəfdən Azərbaycanın ərazi bütövlüyünü, digər tərəfdən isə bölgənin (Dağlıq Qarabağın) öz müqəddəratını təyinetmə hüququnu tanıyır, bu isə separatçı hərəkatın əsas prinsipidir.
Bu haqda Avropa İttifaqı məsələlərini işıqlandıran nüfuzlu “EurActiv” xəbər portalında, Azərbaycan Respublikasının Prezidenti yanında Strateji Araşdırmalar Mərkəzinin (SAM) direktor müavini Gülşən Paşayevanın Ermənistan-Azərbaycan Dağlıq Qarabağ münaqişəsinə dair “The major stumbling block of the Nagorno-Karabakh peace process” məqaləsi dərc olunub.
Məqalədə, ilk öncə münaqişənin tarixinə qısa nəzər salan müəllif, aprel ayında baş vermiş məlum qarşıdurmalardan bəhs edərək, 4 günlük müharibənin münaqişənin həllinə dair göstərilən vasitəçilik səylərini canlandırdığını, bu münaqişənin “Kiprləşdirilməsi” mifini tamamilə darmadağın etdiyini vurğulayır, münaqişədə vasitəçilərin hər iki tərəfin faydalana biləcəyi müvvəqəti razılıq əldə etmələrinin zəruri olduğunu diqqətə çatdırır.
Daha sonra müəllif qeyd edir ki, beynəlxalq ictimaiyyət tərəfindən Azərbaycan Respublikasının ərazisi kimi tanınan, lakin hazırda separatçı rejimin nəzarətində olan Dağlıq Qarabağ bölgəsinin gələcək statusu danışıqlar prosesində hər hansı irəliləyişin əldə olunmasına ən başlıca maneədir. Avropa İttifaqının bu münaqişə ilə bağlı müəyyən dərəcədə neytrallığını saxladığını və təəssüf ki, ATƏT-in Minsk Qrupunun bugünədək əsasən nəticəsiz olmuş vasitəçilik səylərini dəstəklədiyi vurğulanır.
Müəllif Avropa İttifaqının Təhlükəsizlik məsələləri üzrə İnstitutunun aparıcı analitiki Nicu Popescuya istinadən qeyd edir ki, “öz neytrallığını saxlamaq cəhdlərində Avropa İttifaqı Dağlıq Qarabağa münasibətdə ‘bitərəf’ mövqeyini ‘şəxsiyyətin ikiləşməsi’ mövqeyinə dəyişib. Aİ bir tərəfdən Azərbaycanın ərazi bütövlüyünü, digər tərəfdən isə bölgənin (Dağlıq Qarabağın) öz müqəddəratını təyinetmə hüququnu tanıyır, bu isə separatçı hərəkatın əsas prinsipidir”.
Müəəlif hesab edir ki, beynəlxalq aparıcı qüvvələrin bu cür yanaşması yanlış gözləntilər yaradır və münaqişənin həllində hər hansı irəliləyişin əldə olunmasına maneə törədir.
1news.az
