Əli Həsənov: VII Azərbaycan-Rusiya Regionlararası Forumunun təşkili iki ölkənin maraqlarına uyğundur

Bu gün təşkil edilən VII Azərbaycan-Rusiya Regionlararası Forumu iki ölkə münasibətlərinin inkişafı üçün mühüm meydandır.

Bu haqda bu gün jurnalistlərə Azərbaycan Prezidentinin İctimai-siyasi məsələlər üzrə köməkçisi Əli Həsənov forum çərçivəsində bildirib.

Onun sözlərinə görə, hər il Azərbaycan-Rusiya regionlararası foruma 500-dək nümayəndə qatılır:

“Bu foruma Rusiya əyalətlərindən, mərkəzi hökumətdən 250-dən çox nümayəndə qatılıb. İki ölkə münasibətlərinin geniş spektri, o cümlədən iqtisadiyyat, sənaye, kənd təsərrüfatı, humanitar sahədəki əlaqələr müzakirə olunacaq. Ötən forumdan bu vaxtadək görülən işlərlə bağlı hesabat yönümlü çıxışlar olacaq, qarşıdan gələn illər üçün təkliflər müzakirə ediləcək”.

Əli Həsənov qeyd edib ki, bu forum beynəlxalq və regional münasibətlərin hazırki vəziyyətində çox aktualdır:

“Forum iki ölkənin xalqlarının maraqlarına xidmət edir. Rusiya-Azərbaycan əlaqələri gündən-günə inkişaf edir. Bu əlaqələrin inkişafı iki ölkə prezidentinin diqqət mərkəzindədir”.

Xatırladaq ki, Bakıda VII Azərbaycan-Rusiya Regionlararası Forumu öz işinə başlayıb.

Forum çərçivəsində Azərbaycanla Rusiya arasında regionlararası məsələlər, infrastruktur layihələrinin perspektivləri, regionlararası iqtisadi və maliyyə əməkdaşlığı, eləcə də iki ölkə arasında strateji əməkdaşlıq məsələləri müzakirə olunacaq.

Bundan əlavə, forum çərçivəsində müxtəlif dəyirmi masalar təşkil ediləcək.

Qeyd edək ki, VI forum Yekaterinburqda keçirilmişdi.

1news.az