Naxçıvanda yeni bəbir ailəsi aşkar edilib
AMEA Naxçıvan Bölməsi Bioresurslar İnstitutunun əməkdaşları akademik Həsən Əliyev adına Zəngəzur Milli Parkının Soyuqdağ ərazisində və Babək rayonunun Dərəşam adlanan sahəsində apardıqları tədqiqatlar nəticəsində yeni bəbir ailəsi aşkar ediblər.
1news.az Azərtac-a istinadən xəbər verir ki, nadir fauna növlərinin daha çox məskunlaşdığı bu dağlıq ərazilərdə quraşdırılan fototələlər vasitəsilə bir bəbir ailəsi və üç balasının yaşadığı məlum olub.
Bioresurslar İnstitutunun direktoru, akademik Tariyel Talıbovun fikrincə, tropik və subtropik qurşaqların tipik nümayəndəsi olan bəbirlərin milli parkın ərazisində yayılması onun yem ehtiyatının olmasından asılıdır:
“Muxtar respublikada ova qadağanın qoyulması muflonların və bezoar keçilərinin sayının artmasına səbəb olub. Qida bolluğu isə öz növbəsində, ərazilərimizdə dünyanın nadir incilərindən olan bəbirlərin yayılmasına və artmasına münbit şərait yaradıb”.
1news.az
