Azərbaycan Beynəlxalq Bankının rəhbəri dəyişib – FOTO

18:31 - 08 / 12 / 2016

Azərbaycan Beynəlxalq Bankının (ABB) Müşahidə Şurasının iclası zamanı İdarə Heyətinin sədri Elmar Məmmədov vəzifəsindən kənarlaşdırılması qərarı qəbul edilib.

Elmar Məmmədov 2015-ci ildən ABB-nin İdarə Heyətinin sədri idi. O, bu vəzifəyə Cahangir Hacıyevin vəzifədən azad edilməsindən sonra 4 il müddətinə təyin edilmişdi. Daha əvvəl E.Məmədov Azər-Türk Bank və Kapital Bank-ın idarə heyətinin sədri olub.

ABB-nin icracı vəzifəsi Xalid Əhədova həvalə edilib. Bundan əvvəl X.Əhədov dekabrın 2-dən Azər-Türk Bank Azərbaycanın sədri did.

Azərbaycan Respublikasının Prezidenti İlham Əliyev 2015-ci ilin iyulun 15-də “Azərbaycan Beynəlxalq Bankı” Açıq Səhmdar Cəmiyyətinin dövlətə məxsus səhmlərinin özəlləşdirilməyə hazırlanması ilə bağlı sağlamlaşdırılma tədbirləri haqqında Fərman imzalayıb. Fərmanda qeyd edilir ki, son illər bankın idarə edilməsində və investisiya-kredit siyasətində yol verilmiş nöqsanlar, o cümlədən səmərəsi aşağı olan riskli investisiya layihələrinin maliyyələşdirilməsi bankın maliyyə vəziyyətinin pisləşməsinə, problemli aktivlərinin artmasına və likvidliyinin daralmasına səbəb olub. Ona görə də yaranmış vəziyyətin aradan qaldırılması, bankın maliyyə mövqeyinin bərpası və dayanıqlığının təmin edilməsi üçün problemli aktivlərin bankın idarəetməsindən çıxarılaraq ixtisaslaşmış quruma verilməsi zərurəti yaranıb.

Bu məqsədlə Maliyyə Nazirliyi və Azərbaycan Respublikasının Mərkəzi Bankı on beş gün müddətində “Azərbaycan Beynəlxalq Bankı” ASC-yə məxsus problemli aktivləri müəyyən etsinlər və həmin aktivlərin mərhələli şəkildə müvafiq həcmdə likvid vəsait müqabilində bankın balansından çıxarılması və dövlətə məxsus “Aqrarkredit” Qapalı Səhmdar Cəmiyyəti Bank Olmayan Kredit Təşkilatının (bundan sonra - “Aqrarkredit” QSC) idarəetməsinə verilməsi üçün tədbirlər görsünlər.

Fərmanın 1-ci hissəsində nəzərdə tutulmuş aktivlərin “Aqrarkredit” QSC tərəfindən alınmasının və idarə edilməsinin maliyyələşdirilməsi dövlət zəmanəti əsasında uzunmüddətli, aşağı faizli borc istiqrazlarının “Aqrarkredit” QSC tərəfindən emissiya edilərək qiymətli kağızlar bazarında yerləşdirilməsi hesabına təmin edilməsi, eləcə də “Aqrarkredit” QSC tərəfindən emissiya ediləcək istiqrazların tələb olunan həcmi və müddətləri “Azərbaycan Beynəlxalq Bankı” ASC-dən aktivlərin alınması tədbirləri ilə uzlaşdırılır və buna müvafiq dövlət zəmanətinin həcmi hər ilin dövlət büdcəsinin daxili borclanma limitinin məbləğində nəzərə alınması müəyyən edilsin.

Azərbaycan Beynəlxalq Bankı 1992-ci ilin yanvarında təsis edilib. Və ölkənin ən iri banklarından biridir. Bankın əsas səhmdarı Azərbaycan hökumətidir.