“Qarabağ” futbolçusunun törətdiyi qəza yerindən görüntülər - VİDEO – YENİLƏNİB

Bakıda ölümlə nəticələnən ağır yol-nəqliyyat hadisəsinin təfərrüatları məlum olub.

1news.az “Report”a istinadən xəbər verir ki, Ə.Bağırov marketə daxil olmaq üçün idarə etdiyi "Mercedes" markalı avtomobilini yol kənarında saxlayıb.

O, geri qayıdaraq maşınına əyləşmək istəyib. Bu zaman yüksək sürətlə gələn "BMW" markalı avtomobil Ə.Bağırovun yol kənarında hərəkətsiz vəziyyətdə dayanmış maşınına çırpılıb.

Nəticədə piyada qismində Ə.Bağırov, o cümlədən "Mercedes" markalı avtomobildə olan onun həyat yoldaşı Bağırova Günel Məzahir qızı ağır xəsarət alıblar.

G.Bağırovanın qucağında olan 6 aylıq Bağırov Xalid Əbdulbağır oğlu isə avtomobildən bir neçə metr kənara düşərək ölüb.

Qeyd edək ki, APA TV hadisə yerindən görüntülər çəkib. Həmin videonu təqdim edirik:

1news.az

10:53

Bakıda ölümlə nəticələnən ağır yol-nəqliyyat hadisəsi baş verib.

1news.az-ın məlumatına görə, hadisə bu gün səhər saatlarında paytaxtın Suraxanı rayonunun Əmircan qəsəbəsində qeydə alınıb.

Belə ki, “Qarabağ” klubunun qapıçısı Emil Balayevin idarə etdiyi “BMW X5” markalı, 90 OH 111 dövlət nömrə nişanlı avtomobillə Əbdülbağır Bağırovun idarə etdiyi “Mercedes 180” markalı, 10 RB 542 nömrə nişanlı avtomobil toqquşub.

Nəticədə Ə.Bağırov və avtomobildə olan həyat yoldaşı, 1986-cı il təvəllüdlü Bağırova Günel Məzahir qızı və onun qucağında olan 2016-cı il təvəllüdlü oğlu Xalid Bağırov xəsarət alıblar.

Zərərçəkənlər xəstəxanaya aparılıblar. Lakin həkimlərin səyinə baxmayaraq X.Bağırov dünyasını dəyişib.

Faktla bağlı Suraxanı rayon Polis İdarəsində cinayət işi açılıb, araşdırma aparılır.

1news.az