Mübariz Əhmədoğlu: Ermənistanın Rusiyadan aldığı ağır silahlar Şimali Qafqazı müharibə ocağına çevirə bilər
Ermənistanın “Skad” və Smerç”lərlə təlim keçirməsi ilə bağlı Müdafiə Nazirliyi rəsmi məlumat yaydı, video yerləşdirdi. “İsgəndər” raketlərinin tam hazırlığının olması barədə məlumat yayıldı. Guya Ermənistan bunu 25 fevral tarixində baş vermiş Azərbaycanın təxribatına qarşı cavab hazırlayırmış.
1news.az-ın məlumatına görə, bunu Siyasi İnnovasiya və Texnologiyalar Mərkəzinin sədri, politoloq Mübariz Əhmədoğlu Ermənistanın “Skad” və Smerç”lərlə təlim keçirməsi ilə bağlı xəbəri şərh edərkən bildirib:
“Skad” və “Smerç”lər Ermənistanda hələ SSRİ dövründən var. 8 “Smerç” sonradan Çindən alındı. Aprel döyüşlərində Ermənistan “Skad” və “Smerç”lərdən istifadə etmədi. Bu kontekstdə fevralın 25-də qoşunların təmas xəttində baş verənlərin ermənilərin təxribatı olduğu sübut olunur: Ermənilər qoşunların təmas xəttində təxribatı və ondan sonrakı atəşləri əvvəlcədən planlaşdırıbmışlar. Aprel döyüşlərində etmədiyini Ermənistanın indi etməsinin fundamental səbəbi bir il ərzində Ermənistanın bütün parametrlər üzrə sürətlə geriləməsidir. Ona görə Ermənistan özünü satışa çıxarıb.
Eyni vaxtda özünü həm RF, həm İrana, həm də Qərbə təklif edib. Ermənistana gözlənilən “məbləğin” verilməməsi S.Sərkisyanı psixoz vəziyyətə salıb. Ona görə S.Sərkisyan açıq şantaja gedir: Dağlıq Qarabağ münaqişəsi regionunda heç bir zərurət olmadan “ İsgəndər”, “Skad” və “Smerç”lərin iştirakı ilə müharibəyə başlayır. Dağlıq Qarabağ regionunda dağıdıcı hərbi əməliyyatlar müharibənin vaxtının uzanmasına və coğrafiyasının genişlənməsinə səbəb olur. Əlavə iştirakçılar qatılır. Nəticədə Dağlıq Qarabağ regionundakı müharibənin Şimali Qafqaza keçirilməsinə şərait yaranır və RF bunun qarşısını ala bilmir. “İsgəndər”lərin işə düşməsi Türkiyə, İran və Gürcüstanda xof yaradır. Beləliklə, “İsgəndərlərin qısa müddət ərzində neytrallaşdırılması məsələsi aktuallaşır. Bunun üçün də ən yaxşı variant Dağlıq Qarabağ münaqişəsi regionunda başlanmış müharibənin Şimali Qafqaza keçirilməsidir. Şimali Qafqaz ərazisində müharibə yarada bildiyi üçün antiRusiya qüvvələr S.Sərkisyana siyasi və maliyyə dəstəyi verəcəklər”.
Politoloq qeyd edib ki, S.Sərkisyanın aşağı düşmüş nüfuzunu və reytinqinin bərpası istiqamətində addımlar atılacaq:
“Ənənəvi saxtakarlıq və silahlı toqquşmalar variantında keçirilmiş parlament seçkilərini Qərb demokratik seçkilər kimi dəyərləndirəcək. Hakim “Respublika” partiyasının azad, şəffaf və ədalətli seçkilər nəticəsində qalib gəldiyini bəyan edəcəklər. Ermənistana investisiya vədləri veriləcək.
Aydın görünür ki, bütün bu işləri Ermənistan üçün Rusiyanın rəqibləri edəcəkdir. Ermənistan Rusiyadan aldığı silahı Rusiyanın əleyhinə çevirə bildi. Rusiyanın tarixi səhvi ən lənətlənmiş düşməni olan Ermənistana silah verməsidir. Ona görə, Rusiya hadisələrin mahiyyətini indi başa düşüb və Ermənistana bir-birinin dalınca nümayəndə heyətləri göndərir. Ermənistan dayanmayacaq. Çünki Ermənistana lazım olan hər şeyi S.Sərkisyan antiRusiyaçılıq vasitəsilə əldə edə bilər”.
1news.az
