Mübariz Əhmədoğlu: Bütün arqumentlər Sərkisyan üçün antirusiyaçılığın Dağlıq Qarabağdan daha vacib olduğunu sübut edir
Prezident S.Sərkisyan və müdafiə naziri V.Sərkisyan həm NATO, həm də KTMT ilə əməkdaşlığının faydalı olduğunu bildirməkdə davam edirlər. Onların fikrincə, Ermənistan NATO-da əldə etdiyi təcrübəni KTMT-yə keçirə bilər. Ermənistan NATO ilə Rusiya arasında dialoq kanalı olmaq niyyətindədir.
1news.az-ın məlumatına görə, bunu Siyasi İnnovasiya və Texnologiyalar Mərkəzinin sədri, politoloq Mübariz Əhmədoğlu Ermənistanın NATO və KTMT ilə əməkdaşlığı məsələsi ilə bağlı xəbəri şərh edərkən bildirib:
“Ermənistanın NATO-KTMT münasibətləri barədə dedikləri Dağlıq Qarabağ məsələsində S.Sərkisyan komandasının təhtəlşüur mövqeyinin göstəricisidir. NATO Dağlıq Qarabağ məsələsinin Azərbaycanın ərazi bütövlüyü və dövlət suverenliyi prinsipləri əsasında tənzimlənməsini rəsmi şəkildə, açıq mətnlə dəstəkləyir. NATO-nun Buxarest (2008), Lissabon (2010), Çikaqo (2012), Nyu-Port (Cənubi Uels, 2014) və Varşava (2016) sammitlərinin əsas rəsmi sənədi olan yekun bəyannamələrinə baxmaqla bunu aydın görmək olur.
KTMT-nin Dağlıq Qarabağ tənzimlənməsində belə mövqeyi heç zaman olmayıb. Dağlıq Qarabağ tənzimlənməsində hər iki qurumu birləşdirən cəmi bir ifadə var: Bu münaqişə dinc yolla tənzimlənməlidir”.
Politoloq qeyd edib ki, NATO Ermənistanda qrant layihələri reallaşdırır. Vətəndaş cəmiyyətinin bir qismi NATO-nun qrantları hesabına ailəsini dolandırır:
“NATO-nun Ermənistanın vətəndaş cəmiyyətinə ayırdığı qrantların illik miqdarı 100 min dolları ötüb keçmir. NATO digər işlərlə də məşğuldur. Amma bu işlərin Ermənistan üçün maliyyə və ya siyasi dəyəri o qədər də böyük rəqəmlə ölçülmür.
ATƏT-in Yerevan ofisi nizamnaməsində olmayan fəaliyyətlə məşğul olduğu (minasızlaşdırma üzrə proqram reallaşdırırdı) üçün bağlanıb. NATO-ya etimad fondu yaradılır və bunun vasitəsilə minasızlaşdırma sahəsindəki ATƏT-in Yerevan ofisinin yarımçıq qalmış işini davam etdirəcək.
Ermənistan sülhməramlılarının NATO tərkibində iştirakı da siyasi xarakterlidir. Çünki sülhməramlılığa Ermənistanın münasibəti siyasi və dini məsələdir. Kəsab (Suriya, 2014) hadisələri zamanı RF prezidenti V.Putin Suriyadakı erməniləri qorumaq məqsədi ilə Ermənistana Suriyaya sülhməramlı yeritməyi təklif etdi və buna əsas yaratdı. Amma Ermənistan prezidenti S.Sərkisyan V.Putinin təklifini rədd etdi. Hətta Suriyaya erməniləri müdafiə məqsədi ilə gedən keçmiş Qarabağ döyüşçülərini aeroportda həbs etdirdi. 2014-cü ildə Suriya məsələsində ABŞ-ın mövqeyi Rusiyanın mövqeyindən xeyli güclü idi”.
Mübariz Əhmədoğlunun fikrincə, NATO Dağlıq Qarabağ mövzusunda Ermənistana dəstək verməyib:
“Ermənistanda Türkiyənin NATO üzvü olmasını bilirlər. Buna baxmayaraq Ermənistan üçün NATO ən əsas qurumdur. NATO-nun Rusiyaya qarşı mövqeyi sərtləşdikcə Ermənistan NATO-ya daha yaxınlaşır. Bütün arqumentlər S.Sərkisyan üçün antiRusiyaçılığın Qarabağ məsələsindən daha vacib olduğunu sübut edir. Ermənistan NATO-nun Gürcüstandakı “Ləyaqətli tərəfdaş-2017” təlimlərində iştirak edəcəkdir. Bu halda Ermənistanın apardığı siyasətin mahiyyətinin Dağlıq Qarabağ deyil, antiRusiyaçılıq olduğu aydın şəkildə görünür. Rusiyanın dövlət və ictimai-siyasi həyatında erməniərin geniş iştirakı prezident S.Sərkisyanın Rusiya əleyhinə apardığı siyasətin tanınmasna imkan vermir”.
1news.az
