Mübariz Əhmədoğlu: İran Ermənistanı Mehri dəmir yolunu açmağa təhrik edir

İran körfəzi ilə Qara dənizi birləşdirən nəqliyyat dəhlizinin mahiyyətini düzgün başa düşməməsi Ermənistana baha başa gələ bilər. 

1news.az-ın məlumatına görə, bunu Siyasi İnnovasiya və Texnologiyalar Mərkəzinin sədri, politoloq Mübariz Əhmədoğlu deyib. Onun sözlərinə görə, İranın regional siyasətində yeni element İran körfəzi ilə Qara dənizi birləşdirən nəqliyyat dəhlizinin yaradılmasıdır. İranın Cənubi Qafqaz regionunu qazla təchizatında da iştirak niyyəti rəsmən ortalıqdadır. Amma İranın siyasətində ikibaşlı və ya şübhəli məqamlar həmişə olub.

Politoloq bildirib ki, nəqliyyat dəhlizinin yaradılmasında Azərbaycan və Ermənistanın eyni vaxtda iştirakını İranın necə gördüyü barədə heç bir anlayış yoxdur:

“İranın variantının mahiyyəti barədə müəyyən fikir bildirmək olar. Mehri dəmir yolu fəaliyyətə başlayır. Bu yolun Horadiz hissəsindən Gəncə-Gürcüstan istiqamətində təxminən 120 km-lik avtomobil və dəmir yolundan ibarət nəqliyyat dəhlizi yaratmaqla bağlı ekspert səviyyəsində İranın ideyası var. Ərdəbilin qubernatoru Məcid Xudabəxş bir neçə dəfə bu ideyanı səsləndirib. Beləliklə, İran həm Azərbaycan torpaqlarının işğaldan azad olunmasına, Naxçıvanın blokadadan çıxmasına nail olur; Regionda rəqabət qabiliyyətli yumşaq güc yarada bilir.

İranı bu varianta təhrik edən səbəbin konkret motivasiyası da bəllidir. Rəşt-Astara dəmir yolu tikintisi sırf İranın daxili layihəsidir və rəsmi Tehran  üzərinə düşən öhdəliyi yerinə yetirməkdə çətinlik çəkir”.

Dəmir yolunun keçdiyi sahədə yaşayan əhalinin torpağını İran hökumətinə hədsiz baha qiymətinə təklif etdiyini deyən politoloq bildirib ki, prinsipial razılaşmaya görə, dəmir yolunun tikintisi üçün lazım olan torpağı İran alır, Azərbaycan Respublikası kredit vasitəsilə maliyyələşdirir:

“Tehranın İran körfəzi-Qara dəniz nəqliyyat dəhlizində Ermənistanın adını hallandırması İranın Ermənistana müraciəti kimi qəbul edilə bilər. Ermənistanın Mehri dəmir yolunu istifadəyə buraxması rəsmi Tehranın prizmasından həm İran, həm də Ermənistan üçün faydalıdır; İran-Ermənistan münasibətlərinin gələcək taleyi Ermənistanın İranın bu çağırışına verdiyi cavabdan asılıdır”.

Babək Cahandarov