Səbaildə Qurtuluş gününə həsr olunmuş möhtəşəm bayram tədbiri keçirilib – FOTO
Bakının Səbail rayonunun Badamdar qəsəbəsində Milli Qurtuluş Günü ilə əlaqədar möhtəşəm bayram konserti təşkil olunub.
1news.az-ın məlumatına görə, Rayon İcra Hakimiyyətinin təşkilatçılığı ilə keçirilən tədbirdə icra başçısı Eldar Əzizov, rayonun huquq-mühafizə orqanlarının elm, təhsil, mədəniyyət, səhiyyə və digər sahələrin, təsərrüfat və xidmət sahələri kollektivləri, veteran və gənclər təşkilatının, din xadimləri, rayon ictimaiyyətinin nümayəndələri, KİV nümayəndələri və qəsəbə sakinləri iştirak ediblər.
Badamdar qəsəbəsindəki Heydər Əliyev parkında təşkil olunan, dünya və Azərbaycan bəstəkarlarının klassik musiqisindən ibarət bayram tədbirində qeyd olunub ki, 1993-cü ildə yenicə müstəqilliyini qazanmış respublikamız dağılmaq, parçalanmaq təhlükəsi ilə üz-üzə durduğu bir vaxtda ulu öndən Heydər Əliyevin səyləri, bacarığı, təcrübəsi sayəsində Azərbaycan dövlətçiliyi ona qarşı yönəlmiş qəsdlərdən uğurla çıxdı. Ümummilli liderin qətiyyəti xalqa ruh yüksəkliyi gətirdi, inamımızı özümüzə qaytardı, sabitlik və əmin-amanlıq yaratdı və bununla da 15 İyun - tariximizə Milli Qurtuluş Günü kimi daxil oldu.
Qeyd olunub ki, ulu öndər Heydər Əliyevin səyləri nəticəsində Azərbaycan öz müstəqilliyini və dövlətçiliyini qoruyub saxlaya bilib. Heydər Əliyevdən sonra isə bu siyasəti Prezidenti İlham Əliyev uğurla inkişaf etdirib, Azərbaycan daha da möhkəmlənib və qüdrətlənib.
Bayram tədbirində respubikanın xalq artisti Teymur Göyçayevin rəhbəri və baş dirijoru olduğu Qara Qarayev adına Dövlət Kamera Orkestrinin müşayəti ilə Prezident təqaüdçüsü Murad İbrahimov, Beynəlxalq müsabiqələr laureatı Nigar Cəlilova və Orxan Cəlilovun ifasında tanınmış dünya və Azərbaycan klassik bəstəkarlarının əsərləri, xalq mahnıları səslənib, konsert iştirakçılarının çıxışları sakinlərin alqışları ilə qarşılanıb.
Bayram konserti atəşfəşanlıqla başa çatıb.
Babək Cahandarov
