“Tufan” tipli sərhəd gözətçi gəmisi Xəzər dənizinə endirilib – FOTO

S-204 nömrəli “Tufan” tipli sərhəd gözətçi gəmisi xidməti-döyüş fəaliyyətinə başlaması ilə əlaqədar avqust ayının 28-də Xəzər dənizinə endirilib.

1news.az-ın Dövlət Sərhəd Xidmətinə istinadən verdiyi xəbərə görə, Sahil Mühafizəsinin Gəmi İnşası və Təmiri Mərkəzində inşa edilmiş, su tutumu 470 ton olan gəmi mükəmməl naviqasiya və rabitə-radiotexnika avadanlığı, müasir silahlar, o cümlədən raketlər və raket silahlarına qarşı kompleks, gecə-gündüz görmə müşahidə sistemləri və hidroakustik qurğu, həmçinin Xəzər dənizində ağır üzmə şəraitində xidməti vəzifələrini yerinə yetirə bilən itisürətli qayıqla təchiz edilib.

Uzunluğu 62 metr olan sərhəd gözətçi gəmisinin dəniz şəraitində göyərtəsinə helikopterin enməsi də mümkündür. Yeni gəmidən dövlət sərhədlərinin mühafizəsi, sərhədboyu rejimin təmin olunması, karbohidrogen ehtiyatlarının hasilatı və nəqli infrastrukturunun təhlükəsizliyinin təmini istiqamətində xidməti vəzifələrin icrası zamanı istifadə ediləcək.

Babək Cahandarov