Bakıda Türkiyənin Zəfər bayramı münasibətilə rəsmi qəbul təşkil edilib
Avqustun 30-da Türkiyənin Azərbaycandakı səfirliyində Zəfər bayramı və Türk Silahlı Qüvvələri Günü münasibətilə rəsmi qəbul təşkil edilib.
1news.az AZƏRTAC-a istinadən xəbər verir ki, qəbulda rəsmi şəxslər, səfirliyin və Türkiyə Silahlı Qüvvələrinin Azərbaycandakı hərbi attaşeliyinin əməkdaşları, deputatlar, xarici ölkələrin Bakıdakı səfirləri və ictimaiyyət nümayəndələri iştirak ediblər.
Rəsmi qəbul Azərbaycanın və Türkiyənin dövlət himnlərinin səsləndirilməsi ilə başlayıb.
Türkiyənin Azərbaycandakı səfiri Erkan Özoral Prezident Rəcəb Tayyib Ərdoğanın 30 avqust - Zəfər Günü münasibətilə təbrik məktubunu oxuyub. Məktubda türk xalqının və Türkiyə Silahlı Qüvvələrinin Mustafa Kamal Atatürkün rəhbərliyi ilə 1922-ci il avqustun 30-da tarixi zəfər qazandığını bildirilib. Qeyd edilib ki, bu böyük zəfər türk millətinin sarsılmazlığının və möhkəm iradəsinin nümunəsidir. Bütün bunların nəticəsi olaraq bugünkü Türkiyə dövləti meydana gəlib.
1news.az
