Qazaxıstandan gələn sərnişin 595 qram kalium permanqanatla saxlanıldı

Qazaxıstandan Azərbaycana gələn şəxs aeropartda saxlanılıb.

1news.az-ın Dövlət Gömrük Komitəsinə istinadən verdiyi xəbərə görə, Astana-Bakı aviareysi ilə gələn Azərbaycan Respublikasının vətəndaşının əl yükü “X-Ray” baxış-rentgen texnikası vasitəsilə görmrük nəzarətindən keçirilən zaman monitorda şübhəli təsvirlər müşahidə edildiyindən və yükün sahibinin hərəkətləri gömrükçülərdə şübhə doğurduğundan həmin şəxsin əl yükünə təkrar gömrük baxışı keçirilib.

Hava Nəqliyyatında Baş Gömrük İdarəsi əməkdaşlarının apardığı yoxlama zamanı tünd boz rəngli çamadanın içərisindən əvvəlcədən gömrük nəzarətinə təqdim edilməyən, elektron və ya yazılı formada bəyan olunmayan, 2 ədəd karton qutularda qablaşdırılan, üzərində kiril əlifbası ilə “Kaliya Permanqanat” sözləri yazılan hər biri 5 qramlıq 119 ədəd plastik qablar aşkar olunub.

Aşkar edilən maddə fiziki-kimyəvi ekspertizadan keçirilməsi üçün Ədliyyə Nazirliyinin Məhkəmə Ekspertiza Mərkəzinə göndərilib. Mərkəzin təqdim etdiyi ekspert arayışına əsasən 2 ədəd karton qutuda ümumi 119 ədəd plastik qabda, üzərində “Kalium Permanqanat” - 5 qram yazıları olan qara rəngli parıltılı, kristalik formada maddə bir ədəd plastik qabda təmiz çəkisi 5,0 qram və ümumi 119 ədəd plastik qabda ümumi təmiz çəkisi 595,0 qram maddə kalium permanqanatdır (prekursor).

Qeyd edək ki, kalium permanqanat “Azərbaycan Respublikası ərazisində dövriyyəsi qadağan edilmiş, məhdudlaşdırılmış və nəzarət edilən narkotik vasitələrin, psixotrop maddələrin, habelə Azərbaycan Respublikasının ərazisində idxalına, ixracına, tranzit nəql edilməsinə və istehsalına lisenziya (xüsusi razılıq) tələb olunan prekursorların siyahısı”nın IV siyahısıına daxildir.

Faktla bağlı araşdırma aparılır.

1news.az