9 min müəllimin maaşı artırılacaq
“26 may - 2 iyun tarixlərində keçirilmiş müəllimlərin bilik və bacarıqlarının diaqnostik qiymətləndirilməsi tam başa çatıb. Diaqnostik qiymətləndirmədə 17 minə yaxın müəllim iştirak edib”.
1news.az-ın APA-ya istinadən verdiyi xəbərə görə, bunu Təhsil Nazirliyinin İnsan resursları şöbəsinin müdir əvəzi Eşqi Bağırov deyib.
O bildirib ki, hazırda müəllimlərin nəticələri təhlil olunur: “Diaqnostik qiymətləndirmədə iştirak edən 17 min müəllimin arasında böyük əksəriyyət təkrar qiymətləndirməyə qatılıb. Onların nəticələrində artım müşahidə olunur. Geniş təhlillər hazır olduqdan sonra ictimaiyyətə əlavə məlumat veriləcək”.
E. Bağırov qeyd edib ki, qiymətləndirməyə qatılan 17 min müəllimin arasında yalnız 9 min nəfər müəllim əvvəlki illərdə müxtəlif səbəblərə görə diaqnostik qiymətləndirmədə iştirak edə bilməyib: “Qiymətləndirmədə təkrar iştirak edən müəllimlərin əvvəlki illərdə əmək haqları artırılıb. 9 minə yaxın müəllimin, hansı ki, onlar ilk dəfə qiymətləndirmədə iştirak ediblər, onların yeni tədris ilinin əvvəlindən maaşları artımla ödəniləcək”.
Nazirlik rəsmisi müəllimlərin yerdəyişməsinə çıxarılan vakant yerlərin sayını da açıqlayıb. Qeyd edib ki, bu gündən iyunun 11-dək kimi müddətsiz əmək müqaviləsi ilə çalışan müəllimlərin iş yerinin dəyişdirilməsi prosesinə başlanılıb. Yerdəyişmə müsabiqəsinə 6000-dək vakant yer çıxarılıb. Bu, bütün ixtisasları əhatə edir.
E.Bağırovun sözlərinə görə, müəllimlərin yerdəyişməsində yalnız daimi əsaslarla ümumtəhsil müəssisələrində çalışan müəllimlər iştirak edə biləcək: “Onlar yerdəyişməyə əvvəlki illərdə iştirak etdikləri diaqnostik qiymətləndirmə və yaxud işə qəbul üzrə müsabiqənin nəticələri ilə qatıla bilirlər. Həmin nəticələr tərəfimizdən əsas götürüləcək və namizədlər arasında ən yüksək balı toplayan namizəd vakant yerlərə yerləşdiriləcək. Ən yüksək bal kimdə olacaqsa, vakant yerə o namizəd yerləşdiriləcək”.
1news.az