Autizmlilər arasında velosiped yarışı keçirildi

Autizmlilərin İdman Klubları (AİK) autizmli uşaq, yeniyetmə və gənclər arasında velosiped yarışı keçirib.

AİK-in mətbuat xidmətindən 1news.az-a verilən məlumata görə, Dənizkənarı Milli Parkda baş tutan velosiped yarışı Azərbaycan Respublikası Velosiped İdmanı Federasiyasının (AzVİF), Respublika Olimpiya Velosiped Məktəbi, BrendSport.az saytının təşkilatçılığı və AİK İctimai Birliyinin birgə təşəbbüsü ilə həyata keçirilib.

Azərbaycan Xalq Cümhuriyyətinin 100 illik yubileyinə həsr olunmuş tədbirdə Əmək və Əhalinin Sosial Müdafiəsi Nazirliyinin mətbuat xidmətinin rəhbəri Fazil Talıbov, Respublika Olimpiya Velosiped məktəbinin direktoru Faiq Qurbanov, “ASAN Könüllüləri” təşkilatı, valideynlər və digər qonaqlar iştirak ediblər.

Tədbir dövlət himninin səsləndirilməsi ilə açıq elan olunub. Daha sonra tədbirə dəvət olunan musiqiçilərin ifaları dinlənilib. Sonra müəyyən edilmiş yaş qrupları üzrə autizmli uşaq, yeniyetmə və gənclər arasında velosiped yarışına start verilib.

Sonda qaliblər mükafatlandırılıb və xatirə şəkli çəkilib. Daha sonra konsert proqramı davam edib. İdmanın bu növü Autizmlilərin həyatında mühüm rol oynayır. Velosiped yarışının keçirilməsində məqsəd, bu idman nönünün təbliği, həm də klublar arasında daha güclü idmançıları ortaya çıxarmaqdır.

1news.az