Bakıda Fantaziya Festivalı başlayıb
Bu gündən Bakıda “Fantaziya” Mədəni İrs Festivalı başlayır.
1news.az xəbər verir ki, festival Avropa İttifaqının Azərbaycan nümayəndəliyinin dəstəyi ilə “2018-ci il Avropa mədəni irs İli" çərçivəsində keçirilir.
Noyabrın 1-dən 10-dək davam edəcək festivalda məqsəd Bakının mədəni irsinin saxlanmasıdır. Bu çərçivədə Azərbaycan ictimaiyyətini bir-birindən maraqlı, maarifləndirici və eyni zamanda, əyləncəli tədbirlər silsiləsi gözləyir. Tədbirlər sırasına - konsertlər, sərgilər, “dəyirmi masa”lar, konfranslar, film nümayişləri, Bakının maraqlı və aşkar olunmamış küçələrinə bələdçi turları daxildir.
Avropa İttifaqının Azərbaycan nümayəndəliyi tərəfindən festivalın açılış mərasimini keçirilib. Mərasimdə Azərbaycanın milli rəqsləri və milli mətbəxinin nümunələri təqdim edilib.
Xatırladaq ki, festivalın adı XIX əsrin sonlarında Bakıda inşa edilmiş və Şərq ilə Qərb üslubunu birləşdirən memarlıq nümunəsi "Fantaziya" hamamından götürülüb.
Festival Kabo-Verdedən (Yaşıl Burun Adası) ifaçı Miroka Parişin konserti ilə başlayacaq. O, öz yaradıcılığında Portuqaliya, Braziliya, Kuba və Afrika ölkələrinin motivlərini sintez edir.
Qeyd edək ki, festivalı eyni zamanda, “The Landmark” Otel və Biznes Mərkəzi tərəfindən dəstəklənir. Təşəbbüsün rəsmi tərəfdaşları sırasına Azərbaycanın Mədəniyyət Nazirliyi, Dövlət Turizm Agentliyi, “İçərişəhər” Dövlət Tarix-Memarlıq Qoruğu İdarəsi, Azərbaycan Xalça Muzeyi, Maqsud İbrahimbəyov Yaradıcılıq Mərkəzi və “YARAT” Müasir İncəsənət Mərkəzi daxildir. Festival, həmçinin Venesiyanın Ca’ Foscari, ADA, Azərbaycan Dövlət Mədəniyyət və İncəsənət və Azərbaycan Memarlıq və İnşaat universitetləri kimi elmi mərkəzlərlə əməkdaşlıq çərçivəsində həyata keçirilir.
P.Sultanova
