Beyons azərbaycanlı dizaynerin kolleksiyasından geyindi – FOTO
Müğənni Beyons azərbaycanlı dizayner Rüfət İsmayılın kolleksiyasından geyinib.
1news.az xəbər verir ki, bu barədə Rüfət sosial mediada məlumat verib.
O, ifaçının bir neçə fotosunu səhifəsində paylaşaraq "Füsunkar Beyonsu 2018-in dəbli idman kolleksiyasından olan geyimdə görmək məni çox həyəcanlandırdı” qeydini yazıb.
Qeyd edək ki, Rüfət İsmayıl “Affair” brendinin yaradıcısıdır. Rüfət İsmayıl kolleksiyaları Milan, İtaliya, Nyu-York, Dubay, Türkiyə və İran moda həftələri kimi möhtəşəm tədbirlərdə nümayiş etdirilən ilk və yeganə Azərbaycan və Türkiyə dizayneridir. Dizaynerin kolleksiyalarından birinin dünya moda sənayesinin əsas mərkəzi – “Pitti Uomo”da təqdim edilməsi onun beynəlxalq miqyasda istedadlı bir insan kimi tanınmasının göstəricisidir.
Türkiyə Moda Dizaynerləri Assosiasiyası azərbaycanlı modelyer Rüfət İsmayılı “Türkiyənin ən yaxşı dizayneri-2018” mükafatına layiq görüb. Önun geyimləri Nyu-York Moda Həftəsində nümayiş olunub.
1news.az
