Türkiyə Ukraynada humanitar sülhün və atəşkəsin tərəfdarıdır - Çavuşoğlu
Türkiyə Rusiya ilə Ukrayna arasında müharibəni dayandırmaq üçün fəal səylər göstərir. İlkin olaraq Ukraynada humanitar atəşkəsin, sonra isə uzunmüddətli atəşkəsin təmin edilməsi lazımdır.
1news.az-ın Trend-ə istinadən verdiyi xəbərə görə, bu barədə Türkiyə xarici işlər naziri Mövlud Çavuşoğlu bildirib.
Onun sözlərinə görə, Türkiyənin Rusiya ilə dostluq münasibətləri ədalətin bərqərar olması yolunda Ankara üçün maneə deyil.
Nazir qeyd edib ki, müəyyən illərdə Suriya və Liviyada Türkiyə ilə Rusiya arasında çətin dövrlər yaşanıb.
"Ukrayna məsələsində biz münaqişənin qaynar fazasının başlamasının qarşısını almaq üçün fəal səylər göstərdik. Müharibə atəşi söndürülməsə, bütün tərəflər zərər görəcək", - deyə M.Çavuşoğlu vurğulayıb.
Diplomatiya rəhbəri bildirib ki, Rusiya ilə Ukrayna arasında danışıqlarda irəliləyiş var və tərəflər əsas məsələlər üzrə razılığa gəlməyə yaxındırlar:
"Eyni zamanda, Rusiya Federasiyası və Ukrayna prezidentlərinin Türkiyədə və ya başqa bir ölkədə görüşünün təşkili vacibdir".
1news.az
