Naqif Həmzəyev: “Azərbaycan Tacikistan üçün Avropaya açılan bir qapı olacaq”
“Azərbaycan Respublikası Prezidenti cənab İlham Əliyevi Tacikistana səfəri çox önəmli və yadda qalan bir səfər oldu”.
Bunu 1news.az-a Azərbaycan və Tacikistan münasibətləri ilə bağlı açıqlamasında Milli Məclisin deputatı Naqif Həmzəyev deyib.
“Xüsusilə də Tacikistan və Azərbaycan arasında münasibətlərin inkişaf etdirilməsi üçün bundan öncə Tacikistan prezidentinin Azərbaycana və Azərbaycan prezidentinin Tacikistana səfərlərinin böyük rol oynadığnı bilirik. Bu səfər də münasibətlərin inkişaf etdirilməsinə çox böyük töhfə verəcək.
Ən önəmlisi ondan ibarətdir ki, Sovetlər dağıldıqdan sonra həm Azərbaycan, həm Tacikistan müstəqillik yolunda çoxlu itkilər verməli oldular. Hazırda həminki dövrlər tarixdə qalıb, həm Azərbaycan, həm Tacikistan stabil bir dövlətə çevrilib. Hər iki ölkə inkişaf etməkdədir.
Depuat qeyd edib ki, bu gün Azərbaycanın Tacikistana investisiya qoya bilməsi və Tacikistanın inkişaf etdirilməsində mühüm rol oynama imkanları vardır.
“Bu baxımdan da, Azərbaycan və Tacikistanın mövcud iqdisadi potensialının öyrənilməsi və bu iqdisadi potensialın hər iki ölkənin inkişafına cəlb edilməsi mümkündür. Xüsusilə nəqliyyat, logistika, sənaye kooperasiyalarının inkişafı sahəsində investisiya layihələrinin artırılmasında çoxlu yeniliklərin şahidi ola biləcəyik. Azərbaycan yaxın dövr üçün Tacikistana investisiya layihələrini dəstəkləməsinə köməklik göstərəcək.
Biz hər iki ölkədə iqdisadi inkişafın şahidi ola bilərik. Bunlarla yanaşı, Tacikistan və Azərbaycan arasında iqdisadi, siyasi münasibətlərin yaxşı olması ilə yanaşı, mədəni əlaqələrin də inkişaf etdirilməsi üçün böyük potensial var. İlk növbədə Tacikistan xalqı Azərbaycanın dahi şairi Nizami Gəncəvini və Məshəti Gəncəvini sevir, Azərbaycan ədəbiyyatını və mədəniyyətini daha yaxından tanıyır. Bu baxımdan da bu əlaqələrin inkişaf etdirmək çox asandır, sadəcə bu sahədə mərhələli şəkildə layihələrin yerinə yetirmək lazımdır. Bu baxımdan da, cənab prezidentin Tacikistana səfəri zamanı imzalanmış sənədlərə nəzər yetirsək, görərik ki, müxtəlif sahələr üzrə gələcək inkişaf planının şahidi olduq və bu imzalanmış sənədlər həm Azərbaycanın, həm Tacikistanın iqdisadi, siyasi, mədəni sahələrinin inkişaf etdirilməsinə xidmət göstərəcək. Ən qısa zamanda Azərbaycan Tacikistan üçün Avropaya açılan bir qapı olacaq. Azərbaycan vasitəsilə logistik xidmətlərin sayı daha da artacaq və qarşılıqlı təcrübə mübadiləsi həyata keçiriləcək. Ölkələrimizin inkişafına birlikdə töhfələr veriləcək”.
Xatırladaq ki, aprelin 5-də Azərbaycan Respublikasının Prezidenti İlham Əliyev Tacikistan Respublikasına dövlət səfərinə gedib.
