Britaniyalı politoloqdan açıqlama: “Ermənistanın işğal etdiyi ərazilər “qələbə”lərinin zəhərli meyvəsi kimi çürüdü”
“Sərhəd buraxılış məntəqəsinin yaradılması Azərbaycanın öz suverenliyini qorumaqda qərarlı olduğunun ən güclü göstəricisidir”.
Bu sözləri 1news.az-a britaniyalı politoloq Patrik Volş açıqlamasında deyib.
Britaniyalı politoloqun sözlərinə görə, Azərbaycan ərazisinin 20 faizə yaxınının qanunsuz zəbt edilməsi 30 il ərzində regionda böyük qeyri-sabitlik mənbəyi olub:
“İşğal zamanı bu torpaqlar erməni işğalçıları tərəfindən xarabalığa çevrilib. Azərbaycanın təbii sərvətlərini işğalçı qüvvələr talan edib. Qarabağda çox az erməni yaşamaq istədiyi üçün inkişaf zamanla çətinləşib. Ermənistan etnik təmizləməyə məruz qalan 750.000 azərbaycanlını xaricdən gətirilən ermənilərlə əvəz etmək istəsə də bu mümkün olmadı.
Beləliklə, işğal olunmuş ərazilər “qələbə”lərinin zəhərli meyvəsi kimi çürüdü. İndi, 2020-ci ildən bəri bu vəziyyət əksinə gedir. Əhalinin azad olunmuş torpaqlara yenidən köçürülməsi, dağıntılar altında qalan yerlərin yenidən qurulması, yaşayış yerlərinin infrastruktur və obyektlərlə təmin edilməsi, iqtisadiyyatı güclü olan Azərbaycanla mümkün olur. Azərbaycanın öz torpaqlarını işğaldan azad etməsi, regional sabitlik və iqtisadi inkişafa təsir göstərə bilər, bu da təkcə Cənubi Qafqaza, daha geniş Avrasiya əlaqələrinə də fayda verəcək. Ən əsası isə, beynəlxalq hüquq və geri qayıtmaq hüququ baxımından ədalət artıq öz yerini tapıb.
P.Volş həmçinin Azərbaycan Respublikası Dövlət Sərhəd Xidmətinin bölmələri tərəfindən ölkəmizin suveren ərazilərində, Ermənistan ilə sərhəddə, Laçın-Xankəndi yolunun başlanğıcında sərhəd-buraxılış məntəqəsinin qurulmasına da münasibət bildirib.
Politoloqun sözlərinə görə, milli suverenliyin tam reallaşması üçün bu ərazilərdə Azərbaycan dövlətinin gücü tətbiq edilməlidir:
“Aprelin 23-də Azərbaycan Laçın-Xankəndi yolunda monitorinq aparan rəsmi gömrük postu yaratdı. Qarabağa gedən mallara gömrük rüsumunun tətbiq edilib-edilməyəcəyi hələki bəlli olmasa da, lakin qanuni dövlət orqanları tərəfindən qeyri-qanuni malların Azərbaycana keçirilməsinin qarşısı alınacaq. Rusiya sülhməramlıları sərhədçi kimi fəaliyyət göstərə bilmədiklərini sübut etdilər və milli suverenliyin tam reallaşması üçün bu ərazilərdə Azərbaycan dövlətinin gücü tətbiq edilməlidir.
Sərhəd buraxılış məntəqəsinin yaradılmsı Azərbaycanın öz suverenliyini qorumaqda qərarlı olduğunun ən güclü göstəricisidir”.
