Britaniyalı jurnalist: “İlham Əliyev çətin geosiyasi məkanda təcrübəli və məharətlə davranan siyasətçidir”
“Qərb islamofobiyaya və dezinformasiyaya görə, Ermənistanın yanındadır”.
Bu sözləri 1news.az-a açıqlamasında britaniyalı jurnalist Neil Vatson deyib.
Jurnalistin sözlərinə görə, Qərbin Ermənsitanın tərəfində olmasının əsas səbəbi erməni lobbisinin güclü təbliğatıdır:
“İlham Əliyev çətin geosiyasi məkanda təcrübəli və məharətlə davranan siyasətçidir. O, beynəlxalq hüququn Azərbaycanın tərəfində olduğunu bilir, lakin beynəlxalq ictimai rəy, qərbdəki islamofobiya və erməni lobbisinin təbliğatı Qərbi Ermənistanın yanında olmağa sövq edir. Bilirsiniz, buradakı əsas səbəb təbliğatdır. İlham Əliyev və atası Ümummilli Lider Heydər Əliyev öz xalqını müstəqil, Azərbaycanı isə müasir Respublikaya çevirdirlər. Türkiyə və İsraillə müttəfiqlik Azərbaycanın Ermənistana qalib gəlməsinə kömək etdi. İlham Əliyevin münaqişədən sonrakı dövrdə qarşı tərəfə olan mülayim mövqeyi təqdirəlayiqdir. İndi yeganə problem sülhü əldə etmək, Avropa və Qərb siyasətçilərinə Ermənistanın beynəlxalq hüququn normalarını pozduğunu göstərmək, Rusiyanın və İranın Ermənistanın vəkili olduğunu və beynəlxalq hüququn həmişə Azərbaycanın tərəfində olduğunu başa düşməyə nail olmaqdır”.
N.Vatson Azərbaycanın torpaqlarını işğaldan azad etməsinin Cənubi Qafqazda sülhün başlanğıcı ola biləcəyini də vurğulayıb:
“Düşünürəm ki, Azərbaycanın tarixi torpaqlarının 30 ildən sonra erməni işğalından azad edilməsi Cənubi Qafqaza sülh gətirəcək. Bu son nəticə bütün tərəflərin xeyrinə olacaq. İşğaldan azad edilən ərazilər bərpa olunduqdan sonra bir milyona yaxın azərbaycanlı məcburi köçkün dövlətin dəstəyi ilə öz evlərinə qayıda biləcək. Həmçinin bu Ermənistana da faydalı olacaq, Ermənistan Rusiyanın və İranın himayəsindən uzaqlaşa və öz gerçək müstəqilliyini əldə edə bilər. Onlar iki Cənubi Qafqaz qonşusu ilə yaxşı iqtisadi və ticarət əlaqələrindən, xüsusilə enerji sektorunda, iqtisadiyyatlarını inkişaf etdirə bilərlər. Ən nəhayətində hər iki tərəfdən gənclər doğulmadan əvvəl baş verən münaqişə üçün həyatlarını qurban verməyəcəklər”.
