Cavid Osmanov: “Belə nüfuzlu bir təşkilatın sui-istifadə hallarına yol verməsi ciddi narahatlıq doğurur”
“Beynəlxalq Qızıl Xaç Komitəsi nümayəndələri qeyri-qanuni yollarla öz səlahiyyətlərindən istifadə edərək faktiki olaraq onlara mənsub olan nəqliyyat vasitələrilə qaçaqmalçılıq fəaliyyəti göstəriblər”.
Bu sözləri 1news.az-a açıqlamasında Azərbaycan Milli Məclisinin deputatı Cavid Osmanov deyib.
“Əlbəttə onların Qarabağ bölgəsindəki fəaliyyətin ciddi qanun pozuntuları aşkarlanıb. Bu da Dövlət Sərhəd Xidməti tərəfindən müəyyən edilib. Bir neçə dəfə xəbərdarlıq edilməsinə baxmayaraq, onlar qeyri-qanuni əməllərini davam etdiriblər”.
Deputat qeyd edib ki, hazırda Beynəlxalq Qızıl Xaç Komitəsinə məxsus nəqliyyat vasitələrinin Laçın sərhəd-buraxılış məntəqəsi vasitəsilə keçidi dayandırılıb.
“Bu Azərbaycan qanunlarına tam uyğundur. Çünki bura Azərbaycan ərazisidir və Azərbaycan ərazisində də yalnız Azərbaycan qanunları işləməlidir. Eyni zamanda bu beynəlxalq hüququn norma və prinsiplərinə uyğundur.
Belə nüfuzlu bir təşkilatın sui-istifadə hallarına yol verməsi ciddi narahatlıq doğurur və bir daha onu göstərir ki, Laçın keçiş, sərhəd-buraxılış məntəqəsinin Azərbaycan tərəfindən qurulması bir çox qanunazidd əməllərinin qarşısını alır və bundan sonra da qətiyyətlə alacaqdır”.
Xatırladaq ki, ötən müddət ərzində Dövlət Sərhəd Xidmətinin əməkdaşları tərəfindən BQXK-yə aid nəqliyyat vasitələrində dəfələrlə qanunsuz yolla müxtəlif növ qaçaqmalın keçirilməsi cəhdləri aşkarlanmışdır.
Faktlarla bağlı Azərbaycan Respublikasının Cinayət Məcəlləsinin müvafiq maddələri ilə cinayət işi açılıb və zəruri istintaq tədbirləri həyata keçirilənə qədər Laçın dövlət sərhədindən buraxılış məntəqəsindən keçid müvəqqəti olaraq dayandırılıb.
