“Azərbaycan öz ərazisində heç bir beynəlxalq hüquq və normaları pozmadan antiterror tədbirləri həyata keçirir” - AÇIQLAMA
Bu gün Azərbaycan konstitusiya quruluşunun bərpa edilməsi məqsədilə Qarabağda lokal xarakterli antiterror tədbirlərinə başlayıb.
Azərbaycanın Qarabağda lokal xarakterli antiterror tədbirlərini həyata keçirməsi hansı zərurətdən ortaya çıxıb?
Məsələ ilə bağlı 1news.az-a danışan Milli Məclisin deputatı Arzu Nağıyev deyib ki, istər mina terroru, istər Azərbaycan vətəndaşlarına qarşı dinc əhaliyə qarşı terroristlərin törətdiyi əməllər bunun labüd olduğunu bir daha göstərdi:
“Azərbaycan Ordusu Qarabağda lokal xarakterli anti-terror tədbirləri həyata keçirir. Bu son hadisələr göstərdi ki, istər mina terroru, istərsə də dinc əhaliyə qarşı terroristlərin törətdiyi əməllər bunun labüd olduğunu bir daha göstərdi. Ermənilərin son vaxtlar törətdikləri təxribatlar, quruculuq işləri ilə məşğul olan dinc insanları hədəf alması, ötən gün erməni diversantlar tərəfindən basdırılan minaların partlaması zamanı Azərbaycan Avtomobil Yolları Dövlət Agentliyinin əməkdaşları və Daxili İşlər Nazirliyinin nümayəndələrinin həlak olması olması, artıq pik nöqtə idi. Buna görə də mütləq şəkildə həmin terrorçular məhv edilməli və ərazilərimizdən çıxarılmalıdır. Baxmayaraq ki, 2020-ci ilin noyabr sazişinə uyğun olaraq onlar ərazini özləri tərk etməli idilər, lakin onlar bunu etmədilər. Deməli, onlar qovulmalı, əzilməli və məhv edilməlidir. Buna görədə lokal xarakterli antiterror tədbirləri həyata keçirilir. Mina terrorunun davam etdirilməsi, məqsədyönlü şəkildə ermənilər tərəfindən həyata keçirilirdi. Bunun qarşısı alınmalıdır. İstər ermənilərin havadarları, istərsə də terrorçuların havadarları başa düşməlidirlər ki, Azərbaycan ərazisində ikinci bir dövlətin yaradılmasına heç bir zaman imkan verilməyəcək”.
A.Nağıyev qeyd edib ki, Ermənistan tərəfi hər zaman öz havadarlarına güvənərək addımlar atıblar:
“Son vaxtlar Ermənistana bəzi havadarlarının verdiyi bəyənatlardan həvəslənərək bir sıra qanunsuz hərəkətlər edib, addımlar atan erməni təxribatçıları, adlarını erməniyönlü siyasətçi qoyan şəxslər başa düşməlidir ki, Azərbaycan öz ərazisində heç bir beynəlxalq hüquq və normaları pozmadan antiterror tədbirləri həyata keçirib və lazım gəldikcə keçirəcəkdir. Dəfələrlə delimitasiya və demarkasiya bağlı təkliflər oldu, dəfələrlə sülh müqaviləsinin imzalanması üçün təkliflər olundu, Azərbaycan tərəfindən atılan humanitar addımlara laqeyd münasibət bəsləyən ermənilər bilməlidir ki, bunun sonu nə ilə bitəcək. Çünki Qarabağ Azərbaycandır, Xankəndi Azərbaycandır. Burada hansısa qondarma qurumların bayraq qaldırması, hansısa qondarma qurumların qeyri-legetim seçkilər keçirməsi heç bir vaxt olmayacaq. Bütün sərhəd bölgələrində istənilən aqressiyaya Azərbaycan Ordusu və bütün Azərbaycan xalqı cavab verməyə hazırdır”.
Qeyd edək ki, Azərbaycan Silahlı Qüvvələri tərəfindən Azərbaycanın Qarabağ bölgəsində keçirilən lokal xarakterli antiterror tədbirləri davam edir.
Tədbirlər çərçivəsində yalnız legitim hərbi obyektlər və hərbi infrastruktur dəqiq silahlarla hədəfə alınır və sıradan çıxarılır.
