Bakı–Tbilisi–Bakı qatarının hərəkət qrafiki açıqlandı

Bakı–Tbilisi–Bakı marşrutu üzrə qatarın hərəkət qrafiki açıqlanıb.

1news.az xəbər verir ki, məlumatı “Azərbaycan Dəmir Yolları” QSC (ADY) yayıb.

Bildirilib ki, Bakıdan qatar mayın 25-dən etibarən hər gün saat 23:10-da, Tbilisidən isə mayın 26-dan etibarən hər gün saat 21:00-da yola düşəcək.

Məlumata görə, səyahət müddəti sərhəd-gömrük baxışları da daxil olmaqla təxminən 9 saat 30 dəqiqə davam edir.

Qeyd olunub ki, qatar Bakı, Biləcəri, Yevlax, Gəncə, Ağstafa, Böyük Kəsik, Qardabani və Tbilisi stansiyalarında dayanacaq.

Sərnişinlərə səfərlərini planlaşdırarkən hərəkət qrafikini nəzərə almaları tövsiyə olunur.