DGK KİV-də dərman vasitələrinin dövriyyəsinin qadağası ilə bağlı məlumatlara aydınlıq gətirib
“Dərman vasitələri haqqında Azərbaycan Respublikasının müvafiq qanunvericiliyinə əsasən Azərbaycan Respublikasının gömrük ərazisinə gətirilən dərman vasitələrinin gömrük orqanı tərəfindən gömrük nəzarəti və gömrük rəsmiləşdirilməsi dərman vasitələrinin müvafiq qaydada dövlət qeydiyyatına alınmaqla Azərbaycan Respublikası Səhiyyə Nazirliyinin rəyi və icazəsi əsasında həyata keçirilir”.
Dövlət Gömrük Komitəsinin (DGK) mətbuat xidmətindən verilən xəbərə görə, bu barədə DGK-nın bəzi KİV-də müəyyən dərman vasitələrinin dövriyyəsinin qadağan edilməsi ilə bağlı məlumatlarla əlaqədar olaraq məsələyə aydınlıq gətirilməsi üçün yaydığı məlumatda bildirilir.
“Eyni zamanda, ölkəyə gətirilən dərman vasitələrinin mal partiyaları üzərində gömrük nəzarətinin və gömrük rəsmiləşdirilməsinin, o cümlədən Səhiyyə Nazirliyi tərəfindən təqdim olunmuş rəy və icazə sənədlərindəki məlumatların gətirilən mallarla uyğunluğuna nəzarətin daha da gücləndirilməsi və bu sahədə dövlət nəzarətinin səmərəliyinin artırılması məqsədilə Səhiyyə Nazirliyinin müvafiq qurumları ilə əlaqələndirilmə işinin genişləndirilməsi istiqamətində müvafiq tədbirlər həyata keçirilir.
Həmçinin, Azərbaycan Respublikasının gömrük ərazisinə gətirilən dərman vasitələrinin ölkə sərhədindən qanunsuz keçirilməsinin qarşısının alınması ilə əlaqədar müvafiq tədbirlər həyata keçirilmiş və nəticəsi üzrə görülmüş işlər haqqında məlumatlar mütəmadi olaraq ictimaiyyətə çatdırılıb”, deyə məlumatda bildirilir.
APA
