Report.az: “Bakı küçələrində avtobusların sürüşməsi videosu bu gün səhər çəkilib”- FOTO-VİDEO

Bu gün səhər Report.az informasiya agentliyinin saytında Nəsimi rayonunun Hüseynbala Əliyev ilə Hüseyn Seyidzadə  (“Yeganə” şadlıq sarayı yaxınlığında) küçələrinin kəsişməsində yaranmış təhlükəli vəziyyətlə bağlı video çəkilib.

Videodan da aydın görünür ki, buza dönmüş yolda nəinki piyadalar, hətta bir neçə avtobus da sürüşür. Yaranmış hadisədən narahat olaraq, yuxarıda adı çəkilmiş agentliyə istinad edərək biz də öz səhifəmizdə videonu yerləşdirdik.

Lakin, çoxları bu məlumatın həqiqət olmasına inanmadı. Belə ki, blogger Saleh Nəsirov öz oxucularını inandırır ki, bu videoçarx bu gün səhər çəkilməyib.

“Köhnə videoları yaymaqla xalq arasında çaxnaşma yaratmaq olmaz”, - Nəsirov yazaraq, bildirir ki, bu videoçarx keçmişdə çəkilib. 

Saleh Nəsirov sübut olaraq şəhərin həmin istiqamətində yolların normal olmasını bildirir.

Bununla belə, 1news.az öyrənib ki, hazırki video məhz bu gün səhər – 26 yanvar, çərşənbə axşamı, Report.az-ın jurnalisti Samirə Abdullayeva tərəfindən çəkilib.

Məsələ ilə bağlı Report.az-dan da bildirdilər ki, video səhər saat 09:30 radələrində çəkilib.

Beləliklə, fərz etmək olar ki, hazırki videonun yayılmasından sonra şəhərin həmin ərazisi müvafiq  xidmətlər tərəfindən təmizlənib.

1news.az