Mədəniyyət və turizm naziri Əbülfəs Qarayev bir sıra xarici ölkələrin səfirlərini qəbul etdi
26 yanvar 2016-cı il tarixində mədəniyyət və turizm naziri Əbülfəs Qarayev Koreya Respublikası, İsveçrə, Çexiya və Qazaxıstanın ölkəmizdəki Səfirləri Kim Çanq Gyun, Filip Stalder, Vitezlav Pivonka və Beybit İsabayevi qəbul edib.
1news.az nazirliyin Mətbuat xidmətinə istinadən xəbər verir ki, görüşlərdə mədəniyyət və turizm sahələrində əməkdaşlıq məsələləri müzakirə edilmiş, ölkələr arasında yeni layihələrin həyata keçirilməsi üzrə fikir mübadiləsi aparılmış və bu əlaqələrin daha dərinləşdirilməsi üçün bir sıra işlərin görülməsi vurğulayıb.
Nazir Əbülfəs Qarayev Səfirlərə 2016-cı ilin 25–27 aprel tarixlərində Bakı şəhərində keçiriləcək Birləşmiş Millətlər Təşkilatı Sivilizasiyalar Alyansının 7-ci Qlobal Forumu haqqında məlumat vermiş və təmsil etdikləri ölkələrin Forumun işində yaxından iştirakının əməkdaşlığımıza böyük töhvələr verəcəyini bildirib.
Ölkələr arasında turizm sahəsində əməkdaşlıq sahəsində birgə layihələrin gerçəkləşməsi üçün təbliğat işlərinin genişləndirilməsi vurğulanan görüşlərdə, turizm sənayesinin bu işə yaxından cəlb olunması məsələsi də müzakirə olunub.
Söhbət zamanı mədəniyyət sahəsində əməkdaşlığın yüksək səviyyədə olduğu qeyd edilmiş və bildirilmişdir ki, gələcəkdə də ölkələr arasında musiqi festivallarının, birgə mədəniyyət günlərinin keçirilməsi, muzey, kitabxana, kino sahələrində qarşılıqlı mübadilənin həyata keçirilməsi mühüm əhəmiyyət kəsb edir.
Səmimi qəbula görə nazir Əbülfəs Qarayevə təşəkkür bildirilmiş, həmçinin Azərbaycan ilə mədəniyyət və turizm sahələrində əməkdaşlığın bundan sonra da inkişafına inam ifadə edib.
1news.az
