Dövlət Komitəsi Cəlilabad rayonunda seminar treninq keçirib - FOTO
Yanvarın 26-da Dini Qurumlarla İş üzrə Dövlət Komitəsinin və Cəlilabad Rayon İcra Hakimiyyətinin birgə təşkilatçılığı ilə şəhərdəki Heydər Əliyev mərkəzində “Dini radikalizmlə mübarizə işinin təşkili istiqamətində dini icmaların maarifləndirilməsi” mövzusunda seminar treninq keçirilib.
1news.az Dini Qurumlarla İş üzrə Dövlət Komitəsinin Mətbuat xidmətinə istinadən xəbər verir ki, rayonun dini icma rəhbərləri və dindarları ilə bərabər, ağsaqqallar, ziyalılar və ictimaiyyət nümayəndələrinin də iştirak etdiyi tədbiri giriş sözü ilə açan Cəlilabad Rayon İcra Hakimiyyəti başçısının birinci müavini Vidadi Dövlətov rayondakı dini durumu təhlil edərək bildirib ki, burada müxtəlif millətlərin və dinlərin nümayəndələri yaşayır.
O, rayondakı multikulturalizm dəyərlərinə verilən qiyməti məxsusi önə çəkib.
Sonra DQİDK sədrinin birinci müavini Səyyad Salahlı geniş məruzə ilə çıxış edib. O, çıxışında son vaxtlar dünyada baş verən dövlət-din münasibətlərini təhlil edərək xüsusən də İslam ölkələrində baş verən hadisələri önə çəkməklə Azərbaycandakı din-dövlət modeli və multikultural dəyərlərdən, onların sıx əlaqələrindən danışıb. Natiq radikal dini cərəyanlarla mübarizədə yerli dini icma və din xadimlərinin üzərinə düşən vəzifələri önə çəkərək konkret misallarla onlarla mübarizə yollarını sadalayıb.
Tədbirdə çıxış edən Qafqaz Müsəlmanları İdarəsinin Cəlilabad rayonu üzrə səlahiyyətli nümayəndəsi və şəhər dini icmasının sədri Mahmud Əsgərov da bu tədbirin əhəmiyyətindən danışaraq gündəmdə olan mövzunun aktuallığını nəzərə alıb Cəlilabad rayonunda bu mövzu ətrafında keçirilən tədbiri yüksək qiymətləndirib.
O, dini icma nümayəndələrini və nüfuzlu din xadimlərini radikalizmlə mübarizədə ictimai qınaq üsulundan istifadə etməyə çağırıb.İcma sədri dindarları dövlətlə vəhdətə çağıraraq, cəmiyyətimizdə və dinimizdə bölücülük mövqeyini pisləyib.Tədbirin sonu diskussiya şəklində davam etdirilib.Tədbirdə çıxış edənlər indiki həssas dönəmdə dindarların daha diqqətli olmasına ,həmçinin, dini maarifləndirmə işinin artırılmasına, cəmiyyətdə radikallığa şərait yaradan halların aradan qaldırılması istiqamətində hamının səfərbər olmasına, mövcud dini sabitliyi və dini dəyərləri qoruyub saxlamağa çağırıblar.
1news.az
