Çin şirkətləri Azərbaycanda bərpa olunan enerji sahəsində investisiya qoyuluşunda maraqlıdır

Alternativ və bərpa olunan enerji mənbələri sahəsində əməkdaşlıq əlaqələrinin qurulması məqsədilə dünyanın ən iri mühəndislik-layihələndirmə şirkətlərindən olan “POWERCHINA” korporasiyasının nümayəndə heyəti Azərbaycana səfər edib.

1news.az-ın məlumatına görə, Alternativ və Bərpa Olunan Enerji Mənbələri üzrə Dövlət Agentliyinin sədri Akim Bədəlov nümayəndə heyəti ilə görüşərək dövlətlərimiz arasındakı sıx əməkdaşlığı, həmçinin Çin şirkətlərinin Azərbaycanda alternativ və bərpa olunan enerji mənbələrinin inkişafı istiqamətində investisiya qoyuluşu üçün göstərdikləri təşəbbüsü yüksək qiymətləndirdiyini bildirib.

A.Bədəlov Agentliyin qısa zaman ərzində həyata keçirdiyi layihələr və əldə olunmuş uğurlardan bəhs edərək, ölkəmizin alternativ və bərpa olunan enerji mənbələri ilə zənginliyini və sahənin inkişafı üçün güclü siyasi iradənin olduğu qonaqların diqqətinə çatdırıb.

Çinli nümayəndə heyəti investisiya qoyuluşu cəhətdən Azərbaycanın regionun ən cəlbedici ölkəsi olduğunu vurğulayaraq tezliklə alternativ və bərpa olunan enerji mənbələri sahəsində birgə layihələrə başlamaq niyyətində olduqlarını bildiriblər.

Səfər çərçivəsində Dövlət Agentliyi tərəfindən təsis edilmiş “Azalternativenerji” MMC və “POWERCHINA” arasında gələcək fəaliyyət planı üzrə işgüzar görüşlər baş tutub, o cümlədən qonaqlar “AZGÜNTEX” günəş panelləri zavodu, Qobustan Eksperimental Poliqonu, Pirallahı Günəş elektrik stansiyası  ilə tanış olublar.

Qeyd edək ki, 2014-ci ildə “POWERCHINA” şirkətinin illik gəliri 42,4 milyard ABŞ dolları təşkil edib və işçilərinin sayı 200 min nəfərdir. Şirkət 110 ölkədə 1,565 xarici layihələr həyata keçirilir.

1news.az