Keçən il toplanan həyat sığortası haqlarının məbləği 116,5 milyon manat olub
Ötən il Azərbaycanda toplanmış sığorta haqlarının 26,3 faizi və yaxud 116,5 milyon manatı həyat sığortasının payına düşüb.
Azərbaycan Sığortaçılar Assosiasiyasından (ASA) AZƏRTAC-a verilən məlumata görə, 2014-cü illə müqayisədə həyat sığortası bazarı 10,9 faiz böyüyüb.
Həyat sığortasındakı yığımların 59,3 faizi və yaxud 69 milyon manatı həyatın yaşam sığortasının, 26,3 faizi və yaxud 30,7 milyon manatı istehsalatda bədbəxt hadisələrdən sığortanın, 13,1 faizi və yaxud 15,3 milyon manatı həyatın ölüm halından sığortasının, 1 faizi və yaxud 1,2 milyon manatı əmək qabiliyyətinin sığortasının, cəmi 0,3 faizi və yaxud 326 min manatı isə sağalmaz xəstəliklərdən sığortanın payına düşüb.
İl ərzində həyat sığortası üzrə ödənişlərin məbləği isə 52,2 milyon manat təşkil edib. Bu da ümumi ödənişlərin 29 faizini təşkil etməklə, 2014-cü ilə nisbətən 1,8 dəfə çoxdur. Həyat sığortasında ödənişlərin 91,7 faizi və yaxud 47,9 milyon manatı həyatın yaşam sığortasının, 4,2 faizi və yaxud 2,2 milyon manatı həyatın ölüm halından sığortasının, 4,1 faizi və yaxud 2,1 milyon manatı istehsalatda bədbəxt hadisələrdən sığortanın, cəmi 14 min manatı isə sağalmaz xəstəliklərdən sığortanın payına düşüb.
Hesabat dövründə həyat sığortası bazarında toplanmış hər 100 manat sığorta haqqı müqabilində 44,8 manat ödəniş edilib. 2014-cü ildə bu rəqəm 27,2 manat olub.
