Yeni qəsəbələrə köçürülmüş 243 min məcburi köçkündən 225 min nəfəri son 12 ilin payına düşür
Qaçqın və məcburi köçkünlərin sosial-məişət şəraitlərini yaxşılaşdırmaq məqsədilə müxtəlif ərazilərdə salınmış 94 müasir tipli qəsəbələrdən 89-u məhz son 12 ildə tikilib istifadəyə verilib.
1news.az-ın məlumatına görə, bunu Qaçqınların və Məcburi Köçkünlərin İşləri üzrə Dövlət Komitəsində keçirilmiş geniş kollegiya iclası zamanı baş nazirin müavini, adıçəkilən Komitənin sədri Əli Həsənov deyib. Onun sözlərinə görə, bu qəsəbələrə köçürülmüş 243 min məcburi köçkündən 225 min nəfəri son 12 ilin payına düşür.
Ə.Həsənov bildirib ki, həmişə olduğu kimi, 2015-ci ildə də qaçqınların və məcburi köçkünlərin problemlərinin həlli dövlət başçısının ən çox diqqət yetirdiyi prioritet sahələrdən biri olmaqla Prezidentin müvafiq sərəncamları ilə təsdiq edilmiş Dövlət Proqramına və ona edilmiş əlavələrə uyğun olaraq müvafiq tədbirlər həyata keçirilib. Bunların nəticəsidir ki, ötən il məcburi köçkünlər üçün daha 5 müasir tipli qəsəbə istifadəyə verilib, 15 min məcburi köçkünün mənzil-məişət şəraiti yaxşılaşdırılıb.
1news.az
