Bahar Muradova: “Azərbaycan gəncliyi dövlətin dəstəkçisinə çevrilib”

Azərbaycan gəncliyi dövlətin dəstəkçisinə çevrilib.

1news.az-ın məlumatına görə, bunu Gənclər günü münasibətilə hakim Yeni Azərbaycan Partiyasının (YAP) Gənclər Birliyinin nümayəndələri ilə görüş zamanı Milli Məclisin vitse-spikeri Bahar Muradova deyib.

Onun sözlərinə görə, hazırda Azərbaycanda 300 gənclər təşkilatı fəaliyyət göstərir:

“Gənclər cəmiyyətin bütün sahələrində, eyni zamanda Milli Məclisdə də təmsil olunurlar. Son illər bir çox uğurlara imza atan Azərbaycan gəncliyi öz bayramını böyük coşğu ilə qeyd edir”.

YAP Gənclər Birliyinin sədri Seymur Orucov dövlətin gənclər siyasətinə böyük önəm verdiyini qeyd edib:

“Son illər ərzində “Azərbaycan gəncliyi 2011-2015-ci illərdə” Dövlət Proqramı uğurla icra olunub, gənclərin layihələrini maliyyələşdirən Gənclər Fondu yaradılıb. Eyni zamanda dövlət proqramı çərçivəsində xarici ölkələrin tanınmış ali təhsil müəssisələrində təhsil almaq imkanı qazanıblar. Gələcəkdə onların potensialından ölkəmizin inkişafı naminə istifadə olunacaq”.

Gəncləri daha kreativ və təşəbbüskar olmağa çağıran S.Orucov gələn il Azərbaycanda Gənclər gününün 20 illiyinin qeyd olunacağını da diqqətə çatdırıb.

1news.az